Astanada Euronews keńsesiniń ashylýy Qazaqstannyń ǵana emes, búkil Ortalyq Azııa aımaǵynyń medıa keńistigindegi aıtýly oqıǵalardyń biri boldy. Bul komanda halyqaralyq aýdıtorııany elimizdiń mádenıeti, ekonomıkasy jáne murasymen tanystyratyn bolady. Keńse mádenıetter arasyndaǵy dıalog alańy jáne jańa ıdeıalar men kreatıvti sheshimderdi nasıhattaý ortalyǵy retinde mańyzdy ról atqarady, dep habarlaıdy Egemen.kz.
Qazirgi ýaqytta 20 jobany iske asyrý boıynsha jumys júrgizilip jatyr. Olardyń qatarynda mádenıet, óner men ómir salty týraly «Modern Nomads» shoýy, bıznes pen ekonomıkaǵa arnalǵan óńirlik shoý – «East-West Connect», sondaı-aq óńirlik tulǵalarmen suhbattardan turatyn – «Voices from Central Asia» jobalary bar.
Yntymaqtastyqtyń mańyzdy bóligi – Euronews academy jobasyn júzege asyrý. Onyń aıasynda otandyq jýrnalısterge sheteldik spıkerlerdiń qatysýymen oflaın trenıngter men master-klasstar uıymdastyrylatyn bolady. Bul qazaqstandyq BAQ ókilderiniń kásibıligine oń áserin tıgizeri anyq.
Bıyl Qazaqstanda «Mass-medıa týraly» Zań qabyldandy. Jańa Zańǵa sáıkes, BAQ materıaldaryna talap qoıý merzimi – 1 jyl, BAQ suraýlaryn qaraý merzimi – 5 kún, granttyq qarjylandyrý, memlekettik tildiń BAQ-taǵy úlesi – 60% dep belgilendi. Sonymen qatar, jýrnalısterdi akkredıtasııalaýdyń Úlgilik qaǵıdalary bekitildi.
Halyq pen medıa salasy mamandarynyń medıasaýattylyǵyn arttyrý – mınıstrlik qyzmetiniń basym baǵyttarynyń biri. Mınıstrlik salanyń kadrlyq áleýetiniń kásibı deńgeıin arttyrý boıynsha júıeli jumys júrgizýde.
Jyl saıyn medısına, ekologııa, din, qarjy-ekonomıka, quqyq, áskerı is, ultaralyq qatynastar, aýyl sharýashylyǵy, sıfrlandyrý, munaı-gaz salalarynda jýrnalıster men medıa mamandyǵy stýdentteri oqytý kýrstarynan ótedi.
Bıyl salalyq jýrnalısterdi daıarlaý maqsatynda elimizdiń jetekshi joǵary oqý oryndarymen 4 memorandýmǵa qol qoıyldy.
Qyrkúıekte elordada «Astana Media Week 2024» medıa jáne sıfrlyq kommýnıkasııalar salasyndaǵy jyl saıynǵy is-shara tabysty ótti. Bıylǵy sharada quqyqtyq transformasııa, kópplatformaly ekojúıelerdi damytý, óńirlik, sporttyq jáne salalyq jýrnalıstıka, balalar kontenti, sondaı-aq áleýmettik shıelenisti basqarýdaǵy ahýaldyq ortalyqtardyń róline erekshe nazar aýdaryldy.
Sapaly qazaqstandyq televıdenıeni ilgeriletý men damytýǵa baǵyttalǵan «Tumar» ulttyq televızııalyq syılyǵy segizinshi jyl qatarynan ótkizilip keledi. Bıyl «Tótenshe jaǵdaılardaǵy úzdik reportaj» degen jańa nomınasııa qosyldy. Sondaı-aq 2017 jyldan bastap baspa, radıo jáne ınternet jýrnalıstıka salasyndaǵy jetistikteri úshin beriletin «ÚRKER» ulttyq syılyǵy ótkizilip keledi.