1 mlrd teńge qaıtaryldy

Bıyl departament kóleńkeli bıznestiń 40 jaǵdaıyn tirkegen. Sonyń basym bóligi sotqa jetkizilip, zańsyz ispen aınalysýshylar tıisti jazasyn alǵan. Samat Sharyshevtyń sózine qaraǵanda, zańsyz alynǵan tabystyń 1 mlrd teńgesi óndirilip, memleket bıýdjetine aýdarylǵan. Sonyń ishinde  700 mln  teńgesi qolma-qol aqshamen qabyl­danypty.

«Kóleńkeli ekonomıkanyń eń aýyr zar­da­bynyń biri – salyq túsimin tómendetý. Bul áleýmettik baǵdarlamalar men ınfraqurylymdy qarjylandyrýǵa keri áserin tıgizedi. Biz salyq tóleýden jaltarýdyń 3 faktisin anyqtadyq, onyń 2-eýi óndirispen aıaqtaldy jáne shamamen 500 mln teńge óteldi. Bıyl zańsyz kásipkerlikti júzege asyrý faktisi boıynsha 4 iske sotqa deıingi tergeý júrgizildi. Bul – negizinen aksızdeletin ónimniń zańsyz aınalymyna baılanysty qylmystyq ister. Zańsyz aınalymnan 136 myńnan astam temeki qoraby men 1 000 lıtrden astam sýrrogat alkogol alyndy», dedi ETTD orynbasary.

Sondaı-aq oblysta jeke tulǵalardyń sıfrlyq aktıv aınalymy boıynsha zańsyz kásipkerlik qyzmetti júzege asyrýdan memleket kirisine shamamen 400 mln teńge somaǵa múlik pen krıptoaktıv tárkilengen.

«Memleket basshysy eldiń ekonomı­kalyq qaýipsizdigine naqty qaýip tóndiretin, halyqtyń ál-aýqatyna teris áser etetin, qarjy ınstıtýttarynyń jumysyna teris kózqaras qalyptastyratyn jáne keıin ótkir áleýmettik qaqtyǵysqa ákep soqtyratyn qarjy pıramıdalaryn joıý mindetin qoıdy. Biz olardy anyqtaý, jolyn kesý jáne aldyn alý boıynsha turaqty negizde jumys júrgizemiz», dedi S.Sharyshev.

Qarjy pıramıdalaryn qurý fakti­leri boıynsha jyl saıyn birneshe qylmystyq is tirkeledi. Osy jyly 3 qylmystyq is tirkelip, onyń 2-eýi sotqa jiberildi. Mysaly, «Qnet» qurylymdyq bólimsheleriniń zańsyz qyzmetine 125 azamat tartylypty, olarǵa 120 mln teńgeden astam shyǵyn keltirildi, 20,5 mln teńgelik múlikke tyıym salyndy.

PETROPAVL