Sanaýly kúnderden keıin 2024 jyl tarıh qoınaýyna ketip, adamzat jańa 2025 jyldyń jylnamasynyń alǵashqy betterin ashady. Álem jurty qazir kúntizbeniń sońǵy betterin paraqtap, bıylǵa esep berip, keler jylǵa jospar jasap jatyr. «Balapandy kúzde sanaıdy» degendeı, jetistikterin kemeldendirý, kemshilikterin jetildirý maqsatynda ótkenin elekten ótkizip úlgerdi. Biz de – solardyń qataryndamyz.
Táýelsizdik merekesi qarsańynda Almatyda partııamyzdyń qorytyndy jıynyn ótkizdik. Eldegi bedeldi ári yqpaldy qoǵamdyq-saıası kúsh retinde barymyzdy baǵamdadyq, joǵymyzǵa qol jetkizýdi josparladyq.
Atalǵan jıynǵa biz úlken daıyndyqpen keldik. Oǵan deıin barlyq deńgeıdegi máslıhattar depýtattarynyń II respýblıkalyq forýmynda Memleket basshysy Qasym-Jomart Toqaevtyń: «Máslıhattar – jergilikti ózin-ózi basqarý júıesindegi negizgi ınstıtýt. Onyń tıimdiligi depýtattardyń kásibıligine tikeleı baılanysty. Bilimine biligi saı depýtattar korpýsyn jasaqtaýǵa, eń aldymen, olardy usynǵan partııalar múddeli bolýy kerek», degen sózin basshylyqqa ala otyryp, aımaqtarda, atap aıtqanda, Oralda – elimizdiń batys, Tarazda – ońtústik, Petropavlda – soltústik, Pavlodarda – shyǵys pen ortalyq óńirlerdegi partııa fılıaldarynyń toptastyrylǵan semınarlaryn uıymdastyrdyq.
Joǵaryda aıtqan máslıhattar depýtattarynyń forýmynan keıin birden Prezıdent janyndaǵy Memlekettik basqarý akademııasymen birlesip, eldegi saıası partııalardyń arasynan alǵash bolyp «Aýyldyq aýmaqtardy basqarý» dıskýssııalyq alańyn ashty. Baıandamashylar retinde aldyn-ala bekitilgen taqyryptar negizinde óz salasynyń tanymal mamandary tartyldy.
Jalpy, «Aýyl» partııasy joǵaryda aıtylǵan «eldegi bedeldi jáne yqpaldy qoǵamdyq-saıası kúshke» bir jyldyń bederinde aınalǵan joq. Partııamyz eldegi qoǵamdyq-saıası bedel men yqpalǵa sońǵy saıası reformalar men barlyq partııa aktıviniń zor uıymdastyrýshylyq-ıdeologııalyq jumysynyń arqasynda sońǵy jyldary ǵana qol jetkizdi.
Sońǵy saılaýlarda partııamyzǵa saılaýshylar úlken senim artty. Biz Májilisten – 8, máslıhattardan 228 mandat ıemdenip, depýtat sany boıynsha respýblıkada ekinshi orynǵa shyqtyq. «Aýyl» partııasy atynan óńirlik máslıhattarǵa 27 áıel saılandy.
Aýdandar men oblystyq mańyzy bar qalalar ákimderin saılaýda da partııa músheleri elimizdiń úsh aýyldyq aýdany – Abaı oblysy Abaı aýdanynyń, Aqmola oblysy Aqkól aýdanynyń, Túrkistan oblysy Báıdibek aýdanynyń ákimi bolyp saılandy. Buǵan qosa 39 aýyl ákimi – bizdiń partııanyń múshesi.
2024 jylǵy 8 jeltoqsanynda elimizde ótken máslıhattardyń shyǵyp qalǵan depýtattarynyń ornyna saılaýda partııamyzdyń 7 múshesi depýtat mandatyn ıelendi.
Elimizdi ábigerge salǵan kóktemgi sý tasqyny syndy syn saǵatta halqymyzǵa úndeý jasaǵan Memleket basshysyn «Aýyl» partııasy ókilderi de biraýyzdan qoldady. Myńdaǵan partııalastarymyz apat bastalǵan kúnnen tótenshe jaǵdaıdyń bel ortasynda júrdi. «Aýyldyqtar» sý tasqynynan zardap shekken aımaqtarǵa kómek kórsetý boıynsha shtab quryp, belsendiler tasqyn sýdan zardap shekken 211 aýyldyq okrýg pen 5 qala ortalyǵynda apattyń aldyn alý jumysyna jumyldyryldy. Aqtóbe, BQO, Atyraý, Qostanaı, Aqmola oblysynyń tabıǵı apat qursaýynda qalǵan eldi mekenderine qajetti tonnalaǵan gýmanıtarlyq kómek joldady.
Depýtattar tilsiz jaý zalal keltirgen aýyldardyń turǵyndarymen, sharýa qojalyqtary ıelerimen kezdesip, olarǵa jergilikti fılıaldar deńgeıinde kómek uıymdastyrý úshin qarǵyn sý qursaýynda qalǵan oblystarǵa arnaıy saparǵa shyqty. О́ńirlik fılıaldardyń 900-den asa belsendi múshesi men Jastar qanatynyń 1 500 belsendisi apattyń aldyn alýǵa arnalǵan is-sharalarǵa qatysty. Negizgi volonterlik toptar, sonymen qatar partııa qataryndaǵy kásipkerler men fermerler bólgen 76 aýyr tehnıka Atyraý, BQO, SQO, Qostanaı, Aqmola oblysy aımaqtaryndaǵy aýyldarda tabıǵı apattyń aldyn alý jumystaryna jumyldyryldy.
Partııanyń Jastar qanaty Atyraý oblysynda Jambyl oblystyq fılıaly jóneltken 30 tonna gýmanıtarlyq kómekti muqtaj jandarǵa taratyp, Qurmanǵazy aýdanynda zardap shekkenderge arnap 14 qanatty kıiz úı tikti. Jalpy, «Aýyl» partııasy» topan sýdan zardap shekken óńirlerge barlyǵy 168 mln teńge somasyndaǵy 213 tonnadan asa gýmanıtarlyq kómek jiberdi.
Tasqynnyń beti qaıtqan soń odan kelgen zardaptardy el bolyp eńserýge kiristik. Biz zardap shekken azamattarymyzdyń úı-jaılaryn qalpyna keltirý úshin ótken tarıhymyzda óz tıimdiligin dáleldegen «jastardyń qurylys jasaqtaryn» qurý bastamasyn jańǵyrttyq. SQO-da 80 jáne BQO-da 50 stýdentten jasaqtalǵan «Aýyl jastarynyń qurylys jasaǵyn» qurdyq. Olar jaz boıy eńbek etti, tabys tapty.
«Aýyl» partııasy aımaqtarda kórsetilgen járdemnen bólek qaıyrymdylyq qoryn qurdy. Oǵan túsken qarajatqa Aqmola, Soltústik Qazaqstan, Batys Qazaqstan, Qostanaı oblysyndaǵy tasqynnan zardap shekken azamattarymyzǵa kómek kórsetildi. Teriskeı oblystardaǵy shaǵyn sharýashylyǵy bar 135 otbasyna jalpy somasy 11 mln-nan asa teńgege 2 700 bas qaz balapany men 81 tonna olardyń jemi, Batys Qazaqstan oblysyndaǵy otbasylarǵa 20 myń bas taýyq balapany taratylyp berildi.
Buǵan qosa partııa óz saılaýaldy baǵdarlamasynda bergen ýádesi boıynsha «Aýladan dastarqanǵa», «Qaz haby» arnaıy jobasyn ázirledi. Joba aıasynda jınalǵan 3,4 mln teńgege 800 bas qaz balapany men 600 bas broıler taýyq balapany jáne 3 425 kılo olardyń jemi, veterınarlyq dári-dármekteri satyp alynyp, Aqmola oblysy Aqkól aýdanyndaǵy 10 jeke qosalqy sharýashylyqtarǵa taratyldy. Nátıjesinde, 1 tonna 400 kg taýyq eti men 3 tonna 200 kg qaz eti óndirilip, 10 aýyl turǵyny 5 aıda nesıe almaı-aq 1 mıllıon teńgeden astam tabys tapty.
Partııa nazarynan jastar, onyń ishinde NEET sanatyndaǵy jastarmen jumys eshqashan tys qalǵan emes. Bizdiń mamandar «Táýelsizdik urpaqtary» granttyq baǵdarlamasy boıynsha 29 mln teńgelik 12 jobaǵa konsýltasııalyq súıemeldeý kórsetse, «Zhas project» jáne jergilikti bastamalar boıynsha 6 mıllıon teńgelik 6 jobanyń maquldanýyna sep boldy.
Jastar qanaty bıyl sý tasqyny bastalǵan kezde respýblıkadaǵy jastar uıymdary arasynan eń birinshi bolyp zardap shekken otandastarymyzǵa kómek kórsetken volonterlik toptarǵa aınaldy. «Aýyl» partııasy ulttyń rýhanı, mádenı salasynyń da qaıta túleýine jan jaqty úles qosyp júr. Bul máselede de «Aýyl» partııasy Jastar qanatynyń uıymdastyrýymen halyqaralyq kitap kúnine oraılastyrylǵan «Kitapqa ekinshi ómir syıla!» aksııasy barysynda elimizdiń 29 aýdanyna qarasty 59 aýyldyq eldi mekende ornalasqan kitaphanalarǵa 21 myńǵa jýyq kitapty saltanatty túrde tartý etti.
Partııa budan bólek, Memleket basshysynyń tapsyrmasymen qabyldanǵan «Naýryznama» tujyrymdamasy aıasynda eki mańyzdy is-shara úıymdastyrdy. Onyń birinshisi – týǵan ólkeniń ásem kórki men kelbetin, aýyldyń turmysy men tirshiligin, tylsym tabıǵattyń kóz toımas sulýlyǵyn kórsetetin «Aýyl naqyshtary» baıqaý-fotokórmesi. Ekinshisi – ultymyzdyń bata berý dástúrin jas urpaqqa darytý maqsatynda uıymdastyrylǵan «Batamen er kógerer!» respýblıkalyq batagóıler saıysy.
Bıyl S.Seıfýllın atyndaǵy QazATZÝ-men birlesip aýyl sharýashylyǵy qyzmetkerleri kúni qarsańynda elimizdiń 11 JOO stýdentteri arasynda aımaqtyq «Aýyl oıyndary-2024» týrnırin ótkizdik. Jarysqa Astana qalasy, Aqmola, Qaraǵandy oblysyndaǵy joǵary oqý oryndarynyń stýdenttik komandalary qatysty. Týrnırde stýdent jastar asyq atý, láńgi tebý, arqan tartys, dástúrli sadaq tartý, toǵyzqumalaq jáne qazaqsha kúres sııaqty ulttyq sport túrlerinen kúsh synasty.
Partııamyzdyń Májilistegi depýtattyq fraksııasy búginde halyqtyń jaıly turmysy úshin qajet basqa da qujattardy qabyldaýǵa atsalysýmen qatar, joǵaryda atalǵan eki zań jobasyna bastamashylyq jasap, ázirledi. «Agrarlyq nesıe korporasııasy», «QazAgroQarjy» jáne basqa qarjy ınstıtýttarynyń basyn biriktirip, memleketten jyl saıyn bólinip jatqan qarjyny bir jerge toptastyryp, sharýalardyń qarjylyq problemalaryn bir ortalyqta sheshetin «Agrobank» qurýdy usyndy. Bastamany Májilis pen Senat depýtattarynyń 60%-dan astamy qoldady.
«Aýyl» partııasy nazarynan qoǵamnyń áljýaz toptarynyń máselesi de tys qalǵan emes. «Múgedektigi bar adamdardyń quqyqtaryn qorǵaý jónindegi» komıssııanyń fılıaldardaǵy ókilderi depýtat Tańsáýle Serikovpen baılanysa otyryp, ınklıýzıvtik qoǵamnyń birneshe máselesin Májilis minberinen jetkizý múmkindigin aldy. Keıbir máseleler naqty sheshimin tapty.
«Aýyl» partııasynyń qyzmetkerleri Majarstan elshiligi arqyly sol eldegi sý qustaryn ósirýge, olardan alynatyn ónimderdi tereń óńdeýge mamandanǵan bıznes ókilderimen qaz, taýyq ósirý boıynsha nátıjeli kezdesýler ótkizdi. Budan bólek, Eýroodaqqa múshe birneshe el men Ortalyq Azııa jáne Kavkaz elderiniń elshileri arqyly sol memleketterdiń parlamenttik partııalarymen, halyqaralyq jáne jergilikti qoǵamdyq uıymdarmen yntymaqtastyq, áriptestik týraly kelisimderge qol qoıyldy.
Keler jyly «Aýyl» partııasynyń qurylǵanyna 25 jyl tolady. Mereıtoıymyzǵa oraı biz birneshe partııamen seriktestik týraly memorandýmǵa qol qoıýdy josparlap otyrmyz. Qazir Belarýstiń Respýblıkalyq eńbek jáne ádilet partııasymen, Qyrǵyz Respýblıkasynyń «Ishenım» partııasymen baılanys ornatylyp, ekijaqty yntymaqtastyqqa negiz jasaldy. Ázerbaıjannyń Azamattyq yntymaqtastyq partııasymen, Majarstannyń hrıstıan-demokratııalyq halyq partııasymen yntymaqtastyq ornatý maqsatynda is-sharalar josparlanyp otyr.
Partııamyz bıyl zaman talabyna saı tolyq jańǵyrýdan ótip, rebrendıng jasaldy. Bul – partııanyń ımıdjin jáne onyń saıası arenadaǵy ustanymyn nyǵaıtýdaǵy mańyzdy qadam boldy. Biz partııanyń bul atqarǵan isteri teńizge tamǵan tamshydaı ǵana ekenin bilemiz. Desek te, tamshynyń teńizge aınalatynyna senemiz. Biz sol senimge laıyq bolyp, buqara úmitin aqtaýǵa tıispiz. Qajetti zańdar qabyldandy, ary qaraı ony júzege asyrýdy kóp bolyp qolǵa alý kerek.
Serik EGIZBAEV,
«Aýyl» partııasynyń tóraǵasy,
Májilistiń Agraralyq máseleler jónindegi komıtetiniń tóraǵasy