Osy jylǵy kóktem Qazaqstan halqy úshin synaqpen bastalyp, elimizdiń soltústigi men batys aımaǵyn qarǵyn sý alyp ketken edi. Halqymyz bul qaýipti jurt bolyp jumylyp seıiltti. Syndarly kezeńde sý tasqynynan zardap shekken aımaqtarǵa, ózge óńirler gýmanıtarlyq kómek jóneltip, jylý jınap, eriktiler belsendi qyzmet etti, dep jazady Egemen.kz.
Járdem kerýenine sý tasqynan zardap shekken óńir turǵyndaryna qajet kıim-keshek, as-sý, sanıtarlyq-gıgenıalyq zattar men kórpe-kópshik, dári-dármekter jetkizildi.
Memlekettik - kúshtik qurylymdar da qarap qalmady. Áskerıler sý basqan óńirlerdi arshý, qutqarý jumysyna bilek túre aralasty. Tótenshe jaǵdaılar mınıstrliginiń tikushaqtary arqyly shalǵaı aýyldarǵa qajet turmystyq zattar men kúrek, qap, matorly qaıyq syndy quraldar tasymaldandy.
TJM kóktemgi sý tasqyny tusynda Respýblıka boıynsha 8 189 turǵyn úı men 2 988 aýla aýmaǵynan sýdyń baǵyty burylyp, sý sorylǵanyn habarlady.
Al zardap shekken óńirlerge áýe, temirjol jáne avtokólikpen 7 myńǵa jýyq tonna gýmanıtarlyq kómek jetkizilgen.
Erikti bolý - júrek qalaýy
Bıyl shilde aıynda Mádenıet jáne aqparat mınıstrligi «Ulttyq volonterler jelisi» ZTB-men birlesip, «Igi ister marafony» jobasyn júzege asyrdy. Bul biregeı joba otandastarymyzdyń volonterlik, qaıyrymdylyq ispen aınalysýyna yqpal etti. Joba aıasynda kúntizbedegi mańyzdy kúnderge, halyqaralyq jáne túrli áleýmettik jáne mádenı taqyryptarǵa arnalǵan «Jaqsylyq aptalyǵy» men jyl saıynǵy taqyryptyq is-sharalar ótkizildi. Jalpyulttyq joba aıasynda el azamattary 4000-nan asa ıgi is jasaǵan. Qaıyrymdylyq sharalary ekologııa, ınklıýzııa syndy túrli baǵytty qamtyǵan. Marafon 2024 jylǵy 1 jeltoqsanǵa deıin jalǵasty.
«Ardagerlerdi ardaqtaıyq»
«Ardagerlerdi ardaqtaıyq» Amanat partııasynyń jobasy óńirlerde sátti júzege asyp jatyr. Joba aǵa býyn ókilderine, zeınetkerlerge, eńbek jáne tyl ardagerlerine qurmet kórsetýge baǵyttalǵan. Qysqy kúnderi belsendiler ardagerler men jalǵyzbasty qarttardyń úıleri men aýlalaryn tazalap, kómek kórsetedi. Sonymen qatar, belsendiler ardagerlerdiń jaǵdaıyn bilip, azyq-túlik sebetterin tabystap, mekenjaılyq kómek uıymdastyrady. Joba aıasynda qarttarǵa tegin medısınalyq kómek te kórsetý dástúrge aınalǵan.
«Mektepke jol aksııasy»
«Mektepke jol» respýblıkalyq aksııasy mektep oqýshylaryn jalpyǵa birdeı mindetti bilimmen qamtamasyz etý maqsatynda 2024 jyldyń 1 tamyz - 30 qyrkúıek aralyǵynda ótkiziledi.
Qazaqstan Respýblıkasynyń árbir azamaty halyqtyń áleýmettik osal toptarynan shyqqan balalardy mektepke daıyndaýda ataýly kómek kórsetýde azamattyq belsendilik tanyta alady, árbir balaǵa shynaıy qamqorlyq pen nazar aýdarylady.
Aksııanyń az qamtylǵan jáne kóp balaly otbasylardan shyqqan oqýshylarǵa, jetim balalarǵa, sondaı-aq ata-anasynyń qamqorlyǵynsyz qalǵan balalarǵa oqý jylynyń bastalýyna daıyndyq kezinde materıaldyq qoldaý kórsetý jáne áleýmettik sebepter boıynsha balalardyń mektepke kelmeýiniń aldyn alýdy kózdeıdi. Bıylǵy oqý jylynda da bul ıgi shara jalǵasyp, talaı oqýshynyń qatarynan qalmaı mektep tabaldyryǵyn attaýyna sep boldy.
«Halyk» bank uıytqy bolǵan ıgi ister
Halyk bank 100 jyldyq mereıtoıy aıasynda jyl boıy búkil Qazaqstan aýmaǵynda densaýlyq, bilim berý, mádenıet jáne ekologııa salasynda qoǵamdyq mańyzy bar jobalar men áleýmettik bastamalardy iske asyrdy. «100 ıgi is» aksııasy aıasynda Halyk bank Almaty men Astanadaǵy jeke úılerdi gazdandyrýǵa úles qosty.
Byltyr qazaqstandyqtarǵa syılyq retinde kóptegen oıyn-saýyq, áleýmettik-mádenı jáne sporttyq is-sharalar uıymdastyrdy. Onyń ishinde áz-Naýryzdy atap ótýge erekshe eksheýge turarlyq.
Qostanaı oblysy Jitiqara aýdanynda ınvataksı júrýine de bank sep boldy. Bul qyzmet túri «100 ıgi is» keń aýqymdy aksııasy aıasynda Jitiqaradaǵy «Múgedekter dostastyǵy» qoǵamdyq birlestigi men «Qazaqstan Halyq Banki» AQ oblystyq fılıalynyń qoldaýymen júzege asty.
Bank aralasyp halyq ıgiligine berilgen áleýmettik nysandar da turǵyndardy qýantqanyn atap ótken jón.