Ár jyl ult rýhanııatyna túrli tabys ákeledi. Jyl saıyn kitaphana sóresi jańa kitaptarmen tolyǵatyny da sózsiz. Bıyl da qorjynǵa qosylǵan jańa jınaq kóp boldy. Sonyń ishinde «Abaı» baspasynan jaryq kórgen 155 kitapty erekshe atap ótemiz.
Onyń ishinde qazaq ádebıetiniń klassık aqyn-jazýshylarynyń shyǵarmalarynan jasaqtalǵan biregeı týyndylarmen qatar balalar men jasóspirimderge arnalǵan tyń shyǵarmalar da bar. Kórkem ádebıetten bólek, baspanyń qorjyny bıyl qundy dinı-rýhanı baǵyttaǵy, tarıh salasy boıynsha qyzyqty kitaptar men aýyz ádebıetiniń jaýharlarymen de tolyqty. Atap aıtsaq, «Uly tarıh jáne uly áýlıeler», «Uly dala aqıqaty», «Taraz – órkenıetter órimderiniń kýágeri», «Qarahan baba men Aısha bıbi», Altybarmaq babamyzdyń «Muhammedtiń paıǵambarlyq dálelderi», «Turmys-salt jyrlary», «Batyrlyq jyr-dastandar», «Lıro-epostyq jyrlar», «Turmys-salt ertegileri», «Ańyz-áńgimeler», «Qııal-ǵajaıyp ertegiler», «Aýyz ádebıetiniń shaǵyn túrleri», «Haıýanattar týraly ertegiler», taǵy basqalar.
«Abaı» baspasynan jaryq kórgen kórkem ádebıet kitaptarynyń kóshin Dýlat Babataıuly, hakim Abaı, Shákárim, Máshhúr Júsip Kópeıuly bastap, Muhtar Áýezov, Alashorda qaıratkerleriniń shyǵarmalary men keıingi klassık qalamgerler jalǵastyrady. Sonymen qatar atalǵan baspa oqyrman sóresin elimizdiń kórnekti jazýshylary men jas avtorlardyń shyǵarmalarymen tolyqtyryp otyr.
Jańa kitaptar álemdik suranysqa saı, zamanaýı úlgide, boıaýy baı, biregeı dızaında jasaqtalyp, ózine tán tartymdylyǵymen erekshelenedi.
«Abaı» baspasy barlyq kitapty óz qarjysyna shyǵaryp, satyp, avtorlarǵa qomaqty qalamaqy tóleıtin jaǵdaıǵa da jetti. Bıyldyń ózinde 50-den astam avtor men qaıtys bolǵan avtorlardyń muragerleri «Abaı» baspasynan túrli somadaǵy qalamaqy alǵan. Al aldaǵy jyly kitap assortımentin kóbeıtip, qoǵamdy kitap oqýǵa shaqyratyn birqatar qyzyqty joba usynbaq.