Mektepte júrip-aq ǵylymmen aınalysýǵa den qoıǵan jas órenderdiń talabyna súısine qaraısyń. Aqtóbe qalasyndaǵy Nazarbaev zııatkerlik mektebiniń oqýshysy Daır Syrlybaev – IT salasynda aıtarlyqtaı jetistikke jetken alǵyr óren.
Jas talap jaqynda ǵana pernetaqtany kózben basqarýǵa bolatyn jańashyl júıe oılap tapty. Atalǵan tehnologııa kózdiń qozǵalysyn baqylap, arnaıy kamera men jasandy ıntellekt algorıtmderin qoldanady. Iаǵnı qajetti áripti tańdaý úshin paıdalanýshy tek kózin pernetaqtanyń belgilengen aımaǵyna baǵyttap, kirpik qaǵýy jetkilikti. Bul – ásirese qolynan aıyrylǵan nemese matorıkasy damymaǵan jandarǵa taptyrmas kómek.
«Men bul jobany jasaqtaǵanda, aldymen qoǵamǵa paıdasy tıetin qarapaıym ári tıimdi sheshim izdedim. Kózben basqarý júıesi arqyly adamdar eshqandaı fızıkalyq qozǵalyssyz kompıýtermen erkin jumys isteı alady. Dál osy tehnologııa tek elimizde ǵana emes, búkil álemde erekshe suranysqa ıe bolady dep oılaımyn. О́ıtkeni onyń kómegimen mıllıondaǵan adamnyń ómiri jeńildeıdi. Aldaǵy ýaqytta jobany damytyp, túrli startap baıqaýlarǵa qatysýdy josparlap otyrmyz. Maqsatym – el ǵylymynyń damýyna óz úlesimdi qosý. IT salasyna qyzyǵýshylyǵym meni únemi damýǵa umtyldyrady, jańa tehnologııalardyń sońǵy jańalyqtaryn qalt jibermeı qadaǵalap otyramyn. Ustazdarymnyń baǵyt-baǵdary, ata-anamnyń qoldaýy armanyma jetýime qanattandyrady», deıdi Daır.
Aıta keteıik, talabymen tanylǵan keıipkerimizdiń bul ónertabysy Almatyda ótken baıqaýdan úzdik shyqqan. Daır buǵan deıin kóz janarynan aırylǵan jandarǵa arnap aqyldy taıaq pen braıl álipbıine negizdelgen pernetaqtany da oılap tapqan edi. Bul qurylǵylardy múmkindigi shekteýli jandardyń ózderi synaqtan ótkizip, óte qajet dúnıe ekenin aıtqan.