Byltyr 6 qyrkúıekte Munaıly aýdanyndaǵy №8 mektepte oqýshylar astan jappaı ýlanyp, 460 bala aýrýhanaǵa túsken edi. Oblys polısııasy osy iske qatysty tergeý aıaqtalyp, qylmystyq is Munaıly aýdandyq sotyna joldanǵanyn málim etti, dep jazady Egemen.kz.
«Mektep ashanasynyń meńgerýshisi Dámetken Shákenova QR Qylmystyq Kodekstiń 304-baby «adamdardyń jappaı aýrýǵa nemese ýlanýyna ákep soqqan sanıtarlyq erejelerdi nemese gıgıenalyq normatıvterdi buzý» boıynsha aıyptalyp otyr. Jeke kásipker sot barysynda eshqaıda ketpeý jóninde qolhatpen úıine jiberildi», delingen habarlamada.
Tekserý nátıjesinde mektep ashanasynan ishek bakterııalary anyqtalyp, 12 qyzmetkerden stafılokokk tabylǵan. Al ydys jýýshy dızenterııany tasymaldaýshy bolyp shyqqan. Endi kásipkerge aıyppul salynýy nemese eki jylǵa deıin bas bostandyǵynan aıyrý jazasy taǵaıyndalýy múmkin.
Aıta keteıik, aıyptalýshy jeke kásipker osy mektepti 10 jyldan beri ystyq taǵammen qamtamasyz etip kelgen.