Jetisý oblysynda jeke turǵyn úı órtenip, 7 adam zardap shekti. Onyń beseýi qazir aýrýhanada jatyr. Al aýyr hálde jansaqtaý bólimine túsken erli-zaıyptylardy aman alyp qalý múmkin bolmady, dep habarlaıdy Egemen.kz.
Almaty.tv dereginshe, tórt kún buryn 51 jastaǵy arystaı azamatyn jerlegen Bekpaevtar áýleti búgin 47 jastaǵy kelindi joqtap otyr. Al ata-anasynan aırylǵan balalarmen qosa, osy úıge qonaqqa kelgen qyz bala da qazir aýrýhanada. Balalardyń bireýi bolsa, áli de jansaqtaý bóliminde jatyr. Dárigerlerdiń aıtýynsha, 16 jastaǵy jasóspirimniń denesiniń 38-40 paıyzyn kúıik shalǵan.
- Balalar aýyr dárejedegi kúıik jaraqatyn alǵan. Bireýiniń denesin 25, ekinshisinikin 15 paıyz kúıik shalǵan. Olar jansaqtaý bóliminde em qabyldady. Búgingi tańda olardyń jaǵdaıy turaqtalyp, ekeýi de bólimshege aýystyryldy. Qajetti dári-dármekter men medısınalyq quraldar jetkilikti. Jaǵdaıy tolyq jaqsarǵannan keıin ota jasaımyz, – dedi oblystyq balalar aýrýhanasynyń dárigeri Batyrjan Borambaev
Qaıǵyly jaǵdaı 31 jeltoqsanda tańerteń bolǵan. Jarylystyń kúshti bolǵany sonshalyq, úıdiń ekinshi qabatyn kúl-talqan etip, shatyry men qabyrǵalaryn laqtyryp jibergen. Marqumdardyń týystarynyń aıtýynsha, olar gaz shyǵyp turǵanyn aıtyp birneshe ret apattyq qyzmetti de shaqyrǵan.
- Mamandar qaıta-qaıta tekserip, «bári jaqsy» dep ketken eken. Burynǵy qosylǵan gaz kósheden úıge kirgen. Tańǵy saǵat 7:00-de oıanǵanda, elektr jaryǵyn jaqqan. Qysymnan úı jarylyp otyr, – dedi marqumnyń týysy Qaırat Baısalaqov.
- Arystaı ulymnan aıryldym, ol az bolǵandaı jasandy apparatyń kómegimen dem alyp jatqan kelinim de kóz jumdy. Tórt balaǵa ne deımiz? Aýyr qazaǵa tap boldyq. Gazdyń ıisi shyǵyp jatqanda balam shaqyrǵan, tekserip, úndemeı ketip qaldy. Salǵyrttyqtan osyndaı oqıǵa boldy, – dedi marqumnyń anasy Kúlásh Bekpaeva.
Tótenshe jaǵdaılar basqarmasynyń aldyn ala boljamy boıynsha, órt tabıǵı gazdan bolǵan. Biraq jaýapty kompanııa jelilerde esh aqaý joq dep málimdeme jasady.
- Qaýipsizdik tehnıkasy jónindegi nusqaýlyqtarǵa sáıkes, gaz jelilerin paıdalaný jáne jóndeý qyzmetiniń mamandary tómen qysymdy jerasty gaz qubyrlarynyń germetıkalyǵyn tekserdi. Resmı tekserýler nátıjeleri boıynsha, biz qyzmet kórsetetin gaz jelilerinde gaz aǵýy joq jáne olar qalypty jaǵdaıda jumys istep tur, – delingen «QazaqGaz Aimaq» AQ habarlamasynda.
Jetisý oblysy ákiminiń baspasóz qyzmeti apattyń sebebin anyqtaý úshin arnaıy jumys tobynyń qurylǵanyn jetkizdi. Sondaı-aq jarylystan zardap shekkenderge 200 aılyq eseptik kórsetkish kóleminde bir rettik kómek beriletini de málim boldy. Asyraýshysynan aıyrylǵan otbasyndaǵy kámeletke tolmaǵan balalardyń árqaısysyna da aı saıynǵy áleýmettik járdemaqy taǵaıyndalady.
Aıta keteıik, oqıǵanyń mán-jaıy anyqtalyp jatyr. Polısııa bul derekke qatysty qylmystyq is qozǵady.