Astanada jelide tanymal «Dýbaı shokoladyna» qatysty alaıaqtyq jasaǵan er adam sottaldy. Alaıaq ózin satýshy retinde tanystyryp, turǵyndardy 300 myń teńgege san soqtyryp ketken, dep habarlaıdy Egemen.kz.
Astana qalasynyń qylmystyq ister jónindegi aýdanaralyq soty birneshe ret alaıaqtyq áreketter jasady (QK190-baby 3-bóliginiń 4) tarmaǵy) dep aıyptalǵan A.-ǵa qatysty isti qarady.
Is materıaldaryna sáıkes, A. «Dýbaı shokoladyn» satý syltaýymen jábirlenýshilerdi aldap, aqshalaryn birneshe ret ıemdengen. Osylaısha 10 jergilikti turǵynnyń 301 020 teńgesin qaltasyna basqan.
Sottalýshynyń kinási jábirlenýshilerdiń aıǵaqtarymen, banktik aýdarymdarmen jáne qylmystyq is materıaldarymen dáleldengen.
Prokýror aıyptalýshyǵa 3 jyl 6 aı bas bostandyǵyn shekteý túrinde jaza taǵaıyndaýdy suraǵan. Al qorǵaýshy tarap sottalýshyny bas bostandyǵynan aıyrmaýdy ótingen.
«QK-niń 190-baby 3-bóligi 4) tarmaǵynyń sanksııasy múlki tárkilenip, belgili bir laýazymdardy atqarý nemese belgili bir qyzmetpen aınalysý quqyǵynan 6 jylǵa deıingi merzimge aıyra otyryp nemese onsyz, 3 jyldan 7 jylǵa deıingi merzimge bas bostandyǵyn shekteýdi ne aıyrýdy kózdeıdi. Jasaǵan isine ókiný jáne zııandy óteýi jaýapkershilik pen jazany jeńildetetin mán-jaılar dep tanyldy. Aýyrlatatyn mán-jaılar anyqtalǵan joq», delingen habarlamada.
Nátıjesinde, sot úkimimen A. QK-niń 190-baby 3-bóliginiń 4) tarmaǵymen kináli dep tanylyp, 3 jylǵa bas bostandyǵynan shekteldi.Úkim zańdy kúshine engen joq.