Densaýlyq saqtaý mınıstri Aqmaral Álnazarova kásibı boryshyn oryndaý kezinde kórsetken qaısarlyǵy men batyldyǵy úshin jedel medısınalyq járdem qyzmetiniń mamandaryn marapattady.
Mınıstrlikte ótken saltanatta eki feldsher «Densaýlyq saqtaý isiniń úzdigi» tósbelgisin óńirine taqsa, tórt feldsher Qurmet gramotasyn aldy. Barlyq alty feldsher de Jedel medısınalyq járdem qaýymdastyǵynyń «Úzdik qyzmetker» tósbelgisimen marapattaldy. Kezdesýde A.Álnazarova salada iske asyp jatqan aýqymdy joba-josparlardyń retin baıandady.
«Memleket basshysynyń tapsyrmasymen ótken jylǵy 19 sáýirde medısına qyzmetkerleriniń kásibı jaýapkershiligin saqtandyrý tetigi engizildi. Medısına qyzmetkerleriniń mártebesin kóterýge, zańgerlik, qarjylyq jaǵynan qorǵaýǵa baǵyttalǵan mańyzdy zańǵa qol qoıyldy. Áleýmettik qoldaýǵa basymdyq berildi. El kóleminde jedel medısınalyq járdem qyzmetin 20 derbes stansa, 98 qalalyq kishi stansa, 232 aýdandyq bólimshe kórsetedi. Olar ótken jyly 7 mıllıonnan astam shaqyrtýǵa barǵan. Oblystyq, qalalyq jedel járdem stansalarynda bir aýysymda 1 491 kóshpeli brıgada jumys isteıdi. Jedeldiliktiń 4-sanatyndaǵy shaqyrtýlarǵa qyzmet kórsetý uıymdarynyń janyndaǵy JMJ bólimshelerinde 446 brıgada bar. Jedel járdem brıgadalarynyń tıisti qural jabdyǵyn túgendeýge kóńil bólinip keledi. Jergilikti atqarýshy organdar 150-ge jýyq medısınalyq sanıtarlyq kólik satyp aldy. Bıyl 350-ge jýyq kólik jedel járdem qyzmetine beriledi. Jedel járdemniń sapaly qyzmet kórsetýi úshin tıisti zańdarǵa ózgerister engizip, tarıf máselesin qaıta qarap, yntalandyrý jumystaryna qatysty sharalardy batyl qolǵa aldyq, bul jumystardy aldaǵy ýaqytta da jalǵastyrýdy josparlap otyrmyz», dedi A.Álnazarova.
Mınıstr sý tasqyny kezinde, aqtútek boranda, órt sóndirý barysynda tótenshe jaǵdaılar mınıstrliginiń qyzmetkerlerimen ıyq tirese óz mindetin abyroımen atqarǵan feldsherlerdi quttyqtap, júrekjardy lebizin bildirdi.
«Sizder ylǵı da batyldyq pen qaısarlyqtyń úlgisin kórsetip júrsizder. Nebir qıyndyqtarǵa qaramastan kásibı mindetterińizge adaldyq tanytasyzdar. Turǵyndardy aýyr jaǵdaıǵa qaldyrmaıtyn naǵyz batyrsyzdar. Keshegi Aqtaý mańyndaǵy ushaq apatyna da saqadaı saılanyp, jedel jetken áriptesterimiz óz mindetterin abyroıly oryndap, naǵyz bilikti mamandar ekenin kórsetti. Elimizdiń barlyq aımaǵynda ózderińiz sekildi minsiz eńbek etip júrgen jedel járdem qyzmetkerlerine alǵysymdy bildiremin», dep túıindedi mınıstr.
Marapattalǵan feldsherlerdiń ishinde Qarqaraly aýdanyndaǵy dala órti kezinde turǵyndarǵa medısınalyq, evokýasııalyq kómek kórsetip, erlik tanytqan Gúlnaz Boranbaıqyzy, pasıentke jetý úshin muzdaı sýǵa túsýden taıynbaǵan Qamysty jedel járdem stansasynyń feldsheri Sergeı Volkov, borandy kúni bosanatyn áıelge jetýge asyqqan Mádına Ahmetjanova bar. Densaýlyq saqtaý mınıstrliginiń Qurmet gramotasymen marapattalǵan mamannyń biri – Ánel Baımyrzına. Ol qyzmet barysynda naýqastyń týystarynan soqqyǵa jyǵylyp, qazir stasıonarlyq em alyp jatqan soń, kezdesýge kele almady.
О́tken jyly Memleket basshysynyń bastamasymen úsh dáriger «Qazaqstannyń eńbek sińirgen dárigeri» qurmetti ataǵyn aldy. Olarǵa 1000 eselengen AEK mólsherinde birjolǵy yntalandyrý syılyǵy berildi.
Jaqynda medısına, farmasevtıka qyzmetkerleriniń arasynda ótken «Kásibiniń úzdigi» respýblıkalyq konkýrsynyń jeńimpazdary anyqtaldy. Úzdik dep tanylǵan 16 nomınasııanyń jeńimpazy 500 AEK mólsherinde aqshalaı syıaqy aldy.