Ushaq apaty kezinde erlik kórsetkender marapattaldy

Eski jyldy qorytar tusta Aqtaý qalasy mańynda bolǵan ushaq apaty dúıim eldi dúr silkin­dirdi. Áýe kemesi apatynan 30-ǵa tarta jolaýshynyń tiri qalýy – aldymen taǵdyrdyń syıy, sosyn ushqyshtardyń sheberligi men erliginiń nátıjesi bolsa, jerge qulaǵan sátten bastap jan­qııarlyqpen járdem qolyn soz­ǵan mańǵystaýlyqtardyń eńbegi­niń jemisi. Jol boıyndaǵy jolaýshydan bastap sol mańda jumys istep júrgen mekemeler, medısına, tótenshe jaǵdaı, jedel jár­dem, áýejaı qyzmetkerleri judy­ryqtaı jumyldy. Tiri qal­ǵan adam­dardyń barlyǵy aman-saý elderine jiberildi. Meıi­rimdi, uıymshyl qazaqtyń, kıeli Mańǵystaýdyń dańqy álemge jaıyldy.

Memleket basshysy Qasym-Jomart Toqaev Aqtaýdaǵy ushaq apaty kezinde zardap shekken aza­­mattardy qutqaryp, kó­mek kórsetken azamattardyń jan­qııar­lyq áreketin aıryqsha atady. «Qutqarýshylar, dárigerler men tártip saqshylary shuǵyl ári úılesimdi áreket etti, kásibı deń­geıi men azamattyq jaýapkershi­ligi joǵary ekenin kórsetti. Ja­qyn jerdegi Mańǵystaý óńirlik elektr toraby kompanııasynyń jumysshylary birden kómekke keldi. Tóńirektegi turǵyndar da zardap shekkenderdi qutqarýǵa atsalysty. Azamattarymyzdyń janqııarlyǵy arqasynda barynsha kóbirek adamnyń ómirin saq­tap qaldyq. Men qutqarý jumys­taryna qatysqan árbir adamǵa shyn kóńilden rızashy­lyǵym­dy bildiremin. Qazaq halqynyń apattan zardap shekkenderge ja­nashyrlyǵy men tileýlestigi azamattarymyzdyń jappaı qan tapsyrýǵa asyqqanynan da aıqyn baıqaldy», dedi Prezıdent.

Saltanatty shara barysynda Baýyrjan Momyshuly atyndaǵy II dárejeli «Aıbyn» ordenimen «QR Ishki ister mınıstrligi Mań­ǵystaý oblysynyń polısııa departamenti» MM maman-krı­mınalısi Aıbek Álibaev marapattaldy. Krımınalıst A.Álibaev oqıǵa barysynda qaza tapqan jandardyń denelerin tanyp, týystaryna tapsyrý jumysymen aınalysty.

– Qaza tapqan 38 adamnyń týys­tary ár elden kelip, tanytý jumystary júrgizildi. Túr­lerinen anyqtaý múmkin bolmady. Sondyqtan týystarynan suraı otyryp, denelerindegi erekshe belgilermen izdeı bastadyq. Kópshiligi meńine, tyrtyǵyna, tatýırovkasyna, altyn tisine qarap tanydy. Týystaryna óte aýyr boldy. Taný kezinde júregi shydamaǵandarǵa bizdiń medısına mamandarymyz kómek kórsetti, – dedi Aıbek Tahıruly.

Rahymjan Qoshqarbaev atyn­daǵy III dárejeli «Aıbyn» ordenimen Mańǵystaý oblysy tótenshe jaǵdaılar departamenti órt sóndirý jáne avarııalyq-qutqarý jumystary qyzmeti №12 órt sóndirý bóliminiń órt sóndirýshisi-qutqarýshysy Oljas Baıtóre, Qorǵanys mınıstr­ligi 30153 áskerı bólimi alys radıo­­markerlik pýnktiniń bólim­she bastyǵy Botaǵarın Nurlan, Mańǵystaý oblysynyń tótenshe jaǵdaılar departamenti Basqudyq aýyly №2 órt sóndirý bóliminiń bólimshe komandıri Seribolat Ońǵar, Mańǵystaý oblysy tóten­she jaǵdaılar departamenti órt sóndirý jáne avarııalyq-qutqarý jumystary qyzmeti №1 mamandandyrylǵan órt sóndirý bóliminiń aǵa órt sóndirýshi-qutqarýshysy Márlen Sárkenov marapattaldy. «Qurmet» ordeni «Aqtaý halyqaralyq áýejaıy» AQ medısınalyq pýnktiniń meń­gerýshisi Irına Kochergınaǵa, «Mańǵystaý oblystyq kópbe­­ıin­di aýrýhanasy» MKK ortaly­ǵy­nyń meńgerýshisi Baqytjan Qoıbekovke tabystaldy.

– Qaıǵyly oqıǵa kezinde qol qýsyryp qarap otyrmaı, kó­mek kórsetýge jumyldyq. Alǵan marapatym – tıisti oryn­dar aza­mattarymen birge aman qal­ǵan­dardy qutqaryp, olardyń óz elderine oralýyna eńbegi siń­genderdiń arasynda bolǵa­nyma jasalǵan qurmet, berilgen syı. Prezıdentke, oblys basshy­ly­ǵyna, barsha qutqarýshylarǵa alǵys aıtamyn, – dedi I.Kochergına.

Jalpy, 70-ke jýyq azamat túr­li marapattarǵa ıe boldy. Olar­dyń ishinde jaraqattanǵan­dar­ǵa ota jasaǵan dáriger B.Qoıbe­kov­tiń, psıhologııalyq kómek kór­setken «Apattar medısınasy or­ta­lyǵy» MM Mańǵystaý oblysy boıynsha fılıalynyń psıho­logi J.Esenniń eńbekteri eren.

Sondaı-aq óńirde oqıǵa kezin­de ár salada eńbek etken maman­darǵa, bir­qatar buqaralyq aqparat qu­ral­dary ókiline Mańǵystaý ob­lysy áki­mi­niń marapattary tabys­taldy.

Mańǵystaý oblysy