Astana qalasynyń turǵyny kepildi avtomobılderdi satyp alý jáne naryqtyq baǵadan tómen baǵamen berý syltaýymen aqshalaı qarajatty jymqyrǵan, dep habarlaıdy Egemen.kz.
«Astana qalasynyń qylmystyq ister jónindegi aýdanaralyq sotynyń 2024 jylǵy 13 qarashadaǵy úkimimen Iа. alaıaqtyqtyń 5 epızody boıynsha, ıaǵnı 2024 jyldyń 16 naýryzy men 10 maýsymy aralyǵyndaǵy kezeńde kepildi avtomobılderdi satyp alý jáne naryqtyq baǵadan tómen baǵamen berý syltaýymen bótenniń múlkin aldaý jáne senimdi teris paıdalaný jolymen birneshe ret iri mólsherde jalpy somasy 20 mln teńgeden astam aqshalaı qarajatyn jymqyrǵany (QK 190-baby 3-bóliniń 1,4) tarmaqtary) úshin kináli dep tanylǵan», delingen habarlamada.
Sottalǵan 3 jábirlenýshige keltirilgen zalal somasy iri mólsherdi quramaıdy jáne aryzdary sotqa deıingi tergep-tekserýlerdiń biryńǵaı tiziliminde (SDTBT) zańsyz tirkelgen dep sanap, úkimge apellıasııalyq tártippen shaǵym keltirgen. Sondaı-aq jazany jeńildetý suralǵan.
Alaıda, Astana qalalyq sotynyń qylmystyq ister jónindegi sot alqasynyń qaýlysymen úkim ózgerissiz qalǵan.
«Iа.-ǵa qatysty qylmystyq isti birinshi satydaǵy sot qysqartylǵan tártippen qaraǵan, sebebi ol sotqa deıingi tergep-tekserý barysynda da, sotta da óz kinásin moıyndaǵan. Is boıynsha dáleldemelerge, sondaı-aq zalal somasyna daý aıtpaǵan. Oǵan osy is júrgizý áreketiniń quqyqtyq saldary túsindirilgen. Bul rette onyń quqyqtaryn buzýǵa nemese nuqsan keltirýge jol berilmegen, sot QPK-niń 382-babynyń talaptaryn saqtaǵan. Tergep-tekserý barysynda QPK talaptaryn buzýǵa jol berilmegen, sot jábirlenýshige keltirilgen zalaldyń somasyn óteý jóninde sharalar qabyldamaǵanyn eskere otyryp, ádil jáne is-áreketine mólsherles jaza taǵaıyndaǵan», dep habarlady Astana qalasynyń qylmystyq ister jónindegi aýdanaralyq soty.
Sot aktileri zańdy kúshine endi.