Qazaqstan aýmaǵynda satylatyn jáne jalǵa beriletin bastapqy, qaıtalama naryqtaǵy páterlerdiń baǵasy ósti, dep habarlaıdy Egemen.kz.
Ulttyq statıstıka bıýrosy usynǵan málimetke zer salsaq, sońǵy bir jylda (2023 jyldyń jeltoqsanynan 2024 jyldyń jeltoqsanyna deıin) qaıtalama naryqtaǵy páterlerdi qaıta satý baǵasy 4,2%-ǵa, al jańa turǵyn úıdi satý 3%-ǵa ósti. О́tken jyly abattandyrylǵan turǵyn úıdi jalǵa alý aqysy 7,9%-ǵa ósti.
О́ńirlik turǵyda bastapqy turǵyn úı naryǵyndaǵy baǵalar jyldyq mánde Aqtóbede – 12,8%-ǵa, Kókshetaýda – 10,1%-ǵa, Tarazda – 10%-ǵa aıtarlyqtaı ósken.
Qaıtalama turǵyn úı naryǵynda baǵa ósimi boıynsha kóshbasshylar Atyraý (16,9%), Astana (12,9%) jáne Qonaev qalalary (10,1%) boldy. Turǵyn úıdi jaldaý naryǵyndaǵy eń eleýli ósim Taldyqorǵanda (26,6%), Astanada (25,8%), Shymkentte (18,6%), Oralda (16,8%) jáne Petropavlda (16,4%) baıqaldy.
Qarasha aıymen salystyrǵanda 2024 jylǵy jeltoqsanda abattandyrylǵan turǵyn úıdi jalǵa berý baǵasy 1,1%-ǵa, páterlerdi qaıta satý 0,9%-ǵa, jańa úıdi satý 0,2%-ǵa ósti.
«2024 jylǵy jeltoqsanda tirkelgen turǵyn úıdi satyp alý-satý mámileleriniń sany 50 046 qurady, onyń ishinde 10 488-i jeke turǵyn úıler boıynsha, 39 558-i kópqabatty úılerdegi páterler boıynsha jasalǵan. 2024 jylǵy qarashamen salystyrǵanda (39 421), turǵyn úı satyp alý-satý mámileleriniń sany jáne satý operasııalary 27%-ǵa ósti», delingen bıýro habarlamasynda.
Mámileler sany boıynsha kóshbasshylar Astana (9 911 – 19,8%) jáne Almaty (8 845 – 17,7%) qalalary, sondaı-aq Qaraǵandy oblysy (3 638 – 7,3%) boldy. Eń az tranzaksııa Ulytaý oblysynda jasalǵan – 645 (1,3%).
2024 jylǵy qarashamen salystyrǵanda jeltoqsanda turǵyn úıdi satyp alý-satý mámileleriniń sany 0,2%-ǵa azaıǵan. Almaty oblysynan basqa barlyq óńirlerde tranzaksııalardyń ósýi baıqaldy. Eń joǵary ósim Qyzylorda (+70,2%), Jambyl (+45,3%) oblystarynda jáne Astana qalasynda (+42,2%) tirkeldi.
Bul rette, 2024 jylǵy qarashamen salystyrǵanda kóppáterli turǵyn úılerge jasalǵan mámilelerdiń sany 26,6%-ǵa (8 302 tranzaksııaǵa) ósti. 2024 jyldyń jeltoqsan aıynda páterlerge qatysty barlyǵy 39 558 tranzaksııa aıaqtaldy, bul jalpy kórsetkishtiń 79%-yn quraıdy. Kóppáterli úılerdegi turǵyn úıdi satýdyń negizgi úlesi Astana (24,7%), Almaty (20,7%) jáne Qaraǵandy oblysyna (7,9%) tıesili. Bólmeler sany boıynsha satylym boıynsha eki bólmeli páterler kósh bastady.
Jeke turǵyn úılermen jasalǵan mámilelerdiń sany jeltoqsanda 28,5%-ǵa (2 323 tranzaksııaǵa) ósti. Barlyǵy 10 488 tranzaksııa tirkeldi. Jeke turǵyn úıler boıynsha jasalǵan mámileler sanynyń eń kóp ósimi Qyzylorda (+86,2%), Ulytaý (+64,9%) jáne Shyǵys Qazaqstan (+57,4%) oblystarynda baıqaldy. Bir aıda jeke turǵyn úıler boıynsha tranzaksııalar sanynyń tómendeýi baıqalmady.
Bıýro sonymen qatar 2024 jyldyń jeltoqsan aıynda turǵyn úıdi satyp alý-satý mámileleriniń sany ótken jyldyń sáıkes aıymen salystyrǵanda 32,3%-ǵa óskenin habarlady (2023 jylǵy jeltoqsandaǵy 37 818 tranzaksııadan).
Mámilelerdiń eń kóp ósimi Pavlodar oblysynda (72,4%), eń az tómendeýi – Túrkistan oblysynda (-13,9%) baıqaldy. 2024 jylǵy qańtar-jeltoqsanda 2023 jylǵy qańtar-jeltoqsanmen salystyrǵanda tranzaksııalar sanynyń ósýi baıqalady jáne bul ósim 16,8%-dy quraıdy.