Biz ǵumyr keship jatqan ǵasyrdy «qultemirsiz» elestetý múmkin emes. Jahandaný dáýiriniń jańa jaýyngerlerin daıarlaıtyn robottehnıka mamandarynyń jarystary da jıi uıymdastyrylady. Sonyń biri Qaskeleńde ótken – «Daryn FIRST Championship» robottar festıvali.
Eki kún boıy 4-18 jas aralyǵyndaǵy qatysýshylar ınjenerııa, baǵdarlamalaý jáne robottehnıka salasyndaǵy bilimderi men daǵdylaryn kórsetti. Jasampaz oqýshylar jarysatyn bilim dodasyn «Daryn» respýblıkalyq ǵylymı-praktıkalyq ortalyǵy, «USTEM Foundation» qoǵamdyq qory jáne SDU ýnıversıteti birlesip ótkizdi.
Festıval jyl saıyn ártúrli taqyrypta ótedi. Uıymdastyrýshylardyń aıtýynsha, bul balalardyń jańa baǵyttarǵa degen qyzyǵýshylyǵyn damytýǵa múmkindik beredi. Bıylǵy maýsym – sýasty álemin zertteý jáne ekologııalyq máselelerdi sheshýge baǵyttalǵan «DIVE» taqyrybyna arnalǵan. Kádeli konkýrs «FIRST» halyqaralyq baǵdarlamasynyń tórt sanatyn qamtydy. Atap aıtqanda, «FIRST LEGO League Discover», «FIRST LEGO League Explore», «FIRST LEGO League Challenge» jáne «FIRST Tech Challenge».
Mazmundy is-shara joǵary ǵylymı-tehnıkalyq deńgeıde uıymdastyrylyp, talanttar arasynda erekshe taıtalas týdyrdy. Eń úlken qyzyǵýshylyq «FIRST Tech Challenge» sanatynda baıqaldy. Munda jas ınjenerler mehanıka, baǵdarlamalaý jáne elektronıka salasyndaǵy kúrdeli tapsyrmalardy oryndap, robot-saıystyń kórkin qyzdyrdy.
«Qazirgi jahandaný, ınnovasııalyq jańarý zamanynda robottardyń alatyn orny óte erekshe. Sebebi qazirgi zaman – qultemirdiń dáýiri. Aqparat alý, járdem berý, úı sharýasyndaǵy qyzmetterdiń 50 paıyzyn biz úshin robottar jasaıdy. Minekeı, biz robototehnıkanyń balalar men jasóspirimder arasynda tanymal bola bastaǵanyn kórip otyrmyz. «Daryn FIRST Championship» sııaqty festıvalder jastarǵa óz bilimderin praktıkada qoldanýǵa taptyrmas alań», dedi «USTEM Foundation» qoǵamdyq qorynyń dırektory Asylbek Myrzahmetov.
Saıys sońynda 32 komanda bási bıik «Central Asia FIRST Championship 2025» básekesine qatysý kvotalaryn jeńip aldy.
Aıta keteıik, qańtarda dál osyndaı chempıonattar Shymkent, Aqtaý jáne Astana qalalarynda da ótedi. Biz budan neni ańǵaramyz? Bir aıda tórt birdeı aýqymdy saıystyń ótýi robottehnıkanyń balalar men jasóspirimder arasynda tanymal bola bastaǵanynyń aıqyn dáleli.
«Balalardyń kúrdeli ınjenerlik tapsyrmalardy úlken yntamen sheshkenin kórý – biz úshin úlken qýanysh. Bul festıval tek jarys qana emes, oqýshylarǵa óz talanttaryn kórsetýge jáne bolashaq jobalarǵa jańa ıdeıalar tabýǵa múmkindik beretin alań. Robot qurastyrýmen aınalysatyn balanyń zeıini ashylyp, dáldik pen tártipke úırenedi. Atalǵan sala ǵylymnyń barlyq zańy elektronıka, mehanıka, telemehanıka, mehatronıka, ınformatıka, radıotehnıka, elektrtehnıkamen tyǵyz baılanysty», dedi «Daryn» RǴPO bólim basshysy Saıran Baqtııar.
Bekzat Myńaıdaruly