Batys Qazaqstan oblysynda ótken jyldyń qazan aıynan beri 71 783 adam jiti respıratorly vırýsty ınfeksııaǵa shaldyqqan. Bul jóninde Batys Qazaqstan oblystyq sanıtarlyq-epıdemıologııalyq qadaǵalaý departamenti basshysynyń orynbasary Nurlybek Mustaev málimdedi.
Kúz ben qys – túrli tumaý dertiniń órshıtin kezeńi. Degenmen Batys Qazaqstan oblysynda byltyrǵy osy kezeńmen salystyrǵanda aýrý 28,7%-ǵa tómendegen.
– Aýyrǵandardyń 50 262-si – 14 jasqa deıingi balalar. Sonyń ishinde 1 644 jaǵdaı 1 jasqa deıingi balalar arasynda tirkelip otyr. Júktiligine baılanysty esepte turǵan 462 áıelge tumaý tıgen. Aýyrǵandardyń arasynda oqýshylar da az emes, oblystyń 177 mektebinen 3 471 bala tirkeldi, – deıdi Nurlybek Ermekuly.
Oblystyq sanıtarlyq-epıdemıologııalyq qadaǵalaý departamenti basshysynyń orynbasary Gúldana Kereeva ótken jyldyń qorytyndysy boıynsha qorshaǵan ortaǵa júrgizilgen monıtorıng nátıjelerin jarııa etti.
– Qazirgi ýaqytta qorshaǵan ortany baqylaý óte mańyzdy. Qorshaǵan álemge tıip jatqan antropologııalyq áserler kútpegen saldarǵa ákelýi múmkin. Biz óńirdegi atmosferalyq aýanyń, topyraqtyń, sýdyń jaı-kúıin baqylap otyrmyz, – deıdi Gúldana Qaıyrjanqyzy.
Sanıtarlyq-epıdemıologııalyq monıtorıng sheńberinde qorshaǵan ortadan – sý men topyraqtan, atmosferalyq aýadan toqsanyna keminde bir márte synama alynady. Batys Qazaqstan oblysynda sý kózderin baqylaıtyn 469 oryn bar. О́tken jyl ishinde oblystyq sanıtarlyq-epıdemıologııalyq baqylaý departamentiniń mamandary barlyǵy 4 137 márte synama alǵan.
– О́ńirdegi ortalyqtandyrylǵan sýmen jabdyqtaý nysandaryn teksergen kezde, onyń 257-si qalypqa sáıkes kelmedi. Normadan aýytqý Aqjaıyq, Bórli, Báıterek, Qaztalov, Qaratóbe, Syrym, Tasqala, Terekti, Shyńǵyrlaý aýdandarynda anyqtaldy. Mıkrobıologııalyq kórsetkishterge jasalǵan 4 337 synama nátıjesinde 135 jerde qalyptan aýytqý baıqaldy. Mundaı jaǵdaı Bókeıorda aýdanynan basqa barlyq aýdanda, Oral qalasynda kezdesti. Ortalyqtandyrylmaǵan sý nysandaryna jasalǵan 360 synamanyń 45-inde sanıtarııalyq-hımııalyq kórsetkishter normaǵa sáıkes kelmedi, – dedi G.Kereeva.
Departament tarapynan qalypqa saı kelmegen barlyq mekemege sýmen jabdyqtaý nysandaryn tazalaý, jýý, dezınfeksııalaý qajettigi týraly hat jiberildi. Sóıtip, atalǵan barlyq sý qubyrynda jýý, dezınfeksııa jumysy júrgizildi.
Batys Qazaqstan oblysy – munaı-gaz sekildi tabıǵı qazbany belsendi ıgerip jatqan óńir. Sondyqtan departament mamandary atmosferalyq aýanyń jaǵdaıyna da qatań baqylaý júrgizip otyr. «Oblysta atmosferaǵa zııandy zattar taratýy múmkin 155 nysan jiti nazarda» deıdi mamandar.
– Sanıtarlyq-epıdemıologııalyq monıtorıng kezinde túrli núkteden 42 508 márte atmosferalyq aýa synamasy alyndy. Sonyń ishinde 63 synama tórt kórsetkish: shań, kúıe, kómirtegi totyǵy, kúkirtti sýtegi jóninde gıgıenalyq normatıvterge sáıkes kelmedi. Biz bul aımaqta aýrýshańdyq deńgeıi qalyptan asyp ketken jaǵdaıda anyqtalǵan málimetterdi tıisti sheshim qabyldaý úshin múddeli memlekettik organdardyń qaraýyna beremiz, – deıdi G.Kereeva.
Batys Qazaqstan oblysy