Elimizdegi munaı óndirisi rekordtyq kórsetkishke jetti. Energetıka mınıstrligi janyndaǵy ahýaldyq-taldaý ortalyǵynyń málimeti boıynsha, bıyl 25 qańtarda ortasha táýliktik munaı óndirisi tarıhı rekord ornatty – 278,4 myń tonna. Bul 2024 jyldyń uqsas merzimimen salystyrǵanda 10,5%-ǵa artyq. Byltyr 251,9 myń tonna óndirilgen.
Bul birinshi kezekte Teńiz keleshek keńeıý jobasynyń mańyzdy kezeńderiniń aıaqtalýymen, Teńiz ken ornyndaǵy úshinshi býyn zaýytynyń paıdalanýǵa berilýimen baılanysty. Osynyń nátıjesinde bıyl Teńizdegi óndiris deńgeıi 25%-ǵa, 27,8 mln tonnadan 34,7 mln tonnaǵa deıin artpaq. Sarapshylardyń aıtýynsha, bul jaǵdaı eksporttyq tabystyń, oǵan jalǵas salyq túsiminiń jáne Ulttyq qor túsiminiń ulǵaıýyna jol ashady.
Jospar boıynsha elimiz osy jyly 96,2 mln tonna munaı óndirýdi josparlap otyr (byltyrǵy deńgeı – 87,8 mln tonna).
«Teńizshevroıldyń» habarlaýynsha, barlyq óndiris nysandary tolyq qýatqa kóshkennen keıin Teńizdegi shıki munaıdyń jyldyq óndirisi 40 mln tonnaǵa jetpek.
TShO 2024 jyly qańtar-qyrkúıekte 21,4 mln tonna munaı óndirdi. Ken ornyndaǵy jalpy barlanǵan qor kólemi – 3,1 mlrd tonna (25 mlrd barrel).