Búgin Memleket basshysynyń tóraǵalyǵymen Úkimettiń keńeıtilgen otyrysy ótti. Onda birqatar negizgi áleýmettik-ekonomıkalyq máseleler qaraldy, dep habarlaıdy Egemen.kz.
QR Prezıdenti janyndaǵy QSZI Jahandyq ekonomıka jáne ornyqty damý bóliminiń bas sarapshysy Erlan Jakýpov Memleket basshysynyń Úkimettiń keńeıtilgen otyrysynda odan ári damytý úshin aıtarlyqtaı áleýeti bar kólik-logıstıka salasyna basa nazar aýdarǵanyn eske saldy. Atap aıtsaq, Prezıdent elimizdiń halyqaralyq arenadaǵy básekelestik artyqshylyqtaryn qamtamasyz etetin negizgi faktorlardyń biri retinde Transkaspıı dálizin damytýdyń jáne tranzıttik áleýetiniń strategııalyq mańyzdylyǵyn atap ótti.
Jalpy, Úkimet usynǵan málimetter boıynsha, 2024 jyly júk tasymalynyń kólemi turaqty ósim kórsetip, 10%-ǵa ósip, shamamen 1 mlrd tonnany quraǵan. Ásirese, tasymaldaý kólemi 2,7 esege ósken Transkaspıı baǵyty boıynsha konteınerlik tasymaldaý sektorynda aıtarlyqtaı ósim baıqalǵan.
Sarapshynyń pikirinshe, bul jahandyq logıstıkalyq tizbekterge negiz bolatyn negizgi kólik arterııalarynyń dınamıkalyq damýyn kórsetedi.
«Atap aıtqanda, bıyl «QazMunaıGaz» Qashaǵan ken ornynan Aqtaý porty arqyly Baký portyna munaıdyń birinshi tranzıtin sátti júzege asyrdy, bul energetıkalyq baǵyttardy ártaraptandyrýdaǵy mańyzdy qadam boldy. Bul joba Transkaspıı baǵytynyń áleýetin nyǵaıtýǵa jáne jahandyq logıstıkalyq jeliniń negizgi elementi retinde aımaqtyń mańyzdylyǵyn arttyrýǵa kómektesedi.
Dúnıejúzilik banktiń boljamy boıynsha, 2030 jylǵa qaraı Orta dáliz boıynsha Kaspıı teńizi arqyly tasymaldaý kólemi úsh ese artyp, 11 mıllıon tonnany quraıdy, onyń 4 mıllıon tonnaǵa jýyǵy konteınerlerde tasymaldanady. Tranzıttik júkterdiń negizgi bóligi Eýropa men Qazaqstan, sondaı-aq Eýropa men Qytaı arasyndaǵy saýdanyń bir bóligi retinde osy baǵyt arqyly ótedi», dedi Erlan Jakýpov.
Erlan Jakýpov osy órshil maqsattarǵa qol jetkizý úshin kólik ınfraqurylymyn jetildirýdi jalǵastyrý qajet ekendigin tilge tıek etti.
«Logistics Performance Index (LPI) reıtınginiń «kólik ınfraqurylymy» qosalqy ındeksinde Qazaqstan 2018 jylǵy baǵalaýmen salystyrǵanda pozısııasy jaqsaryp, 138 eldiń arasynda 80-orynǵa ıe boldy (2018 jyly 81 oryn). Degenmen, pozısııalardy odan ári nyǵaıtý jáne júk tasymaly kóleminiń ósýin yntalandyrý úshin aıtarlyqtaı kúrdeli salym qajet. Eýropalyq qaıta qurý jáne damý bankiniń (EQDB) boljamdaryna sáıkes, Ortalyq Azııanyń kólik ınfraqurylymyn aıtarlyqtaı jaqsartý úshin qajetti ınvestısııanyń jalpy kólemi Qazaqstan úshin 5,5 mıllıard eýrony jáne jalpy aımaq úshin 18,5 mıllıard eýrony quraıdy», dedi E.Jakýpov.
Osylaısha, Erlan Jakýpov kólik-logıstıkalyq ınfraqurylymdy odan ári damytý eldiń álemdik naryqtaǵy básekege qabilettiligin nyǵaıtýdyń jáne jahandyq ekonomıkalyq prosesterge ıntegrasııasyn arttyrýdyń negizgi faktory bolatynyna toqtaldy.