Qazir otandyq IT mamandar ázirlegen jobalar álemdik naryqqa shyǵyp jatyr. Solardyń biri – oqýshylarǵa sıfrlyq saýattylyqty úıretetin «CodiPlay» platformasy.
Bul – oqýshylarǵa kompıýter tili men robottehnıkany oıyn túrinde úıretetin platforma. Ol mekteptegi sabaq úderisine kedergi keltirmeı, muǵalim men oqýshynyń birlese jumys isteýine múmkindik beredi. Jaqynda ǵana «CodiPlay» edtech-startaby «Series A» qarjylandyrý raýndy sheńberinde 9 mln dollar ınvestısııa tartty. Otandyq ónim osylaısha, BAÁ, Saýd Arabııasy men Qatar naryǵyna shyǵa alady. Kompanııa osy óńirlerde eki jyl kóleminde 3000 mektepti qosýdy josparlap otyr.
«Investorlar tarapynan kórsetilgen qoldaýǵa dán rızamyz. Osyndaı qoldaý arqyly biz qarqyndy damyp, MENA óńirinde sheshimderimizdi sátti engizýge múmkindik aldyq. Mekteptegi zamanaýı oqytý qoljetimdi ári tıimdi bola túspek. Biz balalardyń IT salaǵa yntasyn anyq kórip otyrmyz. Olar bizdiń ádistememizdiń arqasynda baǵdarshamdy jobalaı alady, shlagbaým júıesi qalaı qurylǵanyn biledi, sonymen qatar aqyldy úıdiń júıesi qalaı jumys isteıtinin túsinedi. Osyndaı sheshimder arqyly oqýshylardyń dıdjıtal daǵdylary artyp jatyr», dedi jobanyń negizin qalaýshy Janádil Taldybaev.
Astana, Almaty qalalarynyń mektepterimen qosa, Túrkistan oblysy Keles aýdany, Aqtóbe oblysy Hromtaý aýdany jáne Qaskeleńdegi mektepter de zamanaýı ádistememen sıfrlyq saýatyn arttyryp jatyr. Balalar «CodiPlay» kómegimen IoT-gadjetter negizinde qurylǵylardy óz betinshe qurastyra alady.
Aıta keteıik, «CodiPlay» – 2021 jyly qurylǵan startap. Sodan beri atalǵan joba Ońtústik Koreıa, Ulybrıtanııa, Indonezııa sekildi uzyn-yrǵasy 13 memlekettegi 600-den asa mektepti qamtydy. Kompanııa Birikken Ulttar Uıymynyń sıfrlyq qoǵamdyq ıgilik retinde baǵasyn alyp, Fınlıandııanyń Bilim berý alıansynyń fın sapa sertıfıkatymen belgilendi. Qazirgi kezde «CodiPlay» jobasynyń quny 100 mln dollarǵa baǵalanyp otyr. Bul – elimizde qurylǵan bilim salasyndaǵy (EdTech) kompanııalar arasyndaǵy rekordtyq kórsetkish.