Endi poıyzda da ınternet ustaıdy. Qanatqaqty joba Sıfrlyq damý, ınnovasııalar jáne aeroǵarysh ónerkásibi mınıstrligi men «Eutelsat-OneWeb» kompanııasy arasyndaǵy kelisimniń arqasynda júzege asqan.
Spýtnıktik ınternet ázirge «Astana-Almaty» baǵyty boıynsha júretin №3/4 poıyzdarynyń jolaýshylaryna qoljetimdi. Alǵashqy saparda 500 jolaýshy ınternetke qosylý múmkindigin qoldandy. Olar jańa qyzmet arqyly «WhatsApp»-ta beıneqońyraý jasap, «YouTube»-tan beınejazbalar kórdi.
«QTJ poıyzynda tómen orbıtalyq «Eutelsat-OneWeb» spýtnıktik tehnologııasyn qoldaný arqyly qanatqaqty jobanyń iske qosylýy – kólikti sıfrlandyrý baǵytyndaǵy mańyzdy qadam. Áriptesterimizben atqarylǵan jumystyń nátıjesinde kúrdeli jaǵdaılarda da jolaýshylarǵa turaqty ári joǵary jyldamdyqty (50–100 Mb/s) ınternet qoljetimdi bolmaq», dedi Sıfrlyq damý, ınnovasııalar jáne aeroǵarysh ónerkásibi mınıstri Jaslan Mádıev.
Osy jobanyń arqasynda ınternet ustamaıtyn shalǵaı aımaqtarda da ınternet turaqty ári jyldam bolmaq.
«Poıyzdarda ınternet qosý – jolaýshylar tasymalyn damytý jolyndaǵy mańyzdy qadam. Aldaǵy ýaqytta osy qyzmetti keńeıtip, aldymen «Talgo» poıyzdarynyń barlyq 15 baǵytyna ınternet qosýdy josparlap otyrmyz», dedi «Jolaýshylar tasymaly» AQ basqarma tóraǵasy Ánýar Ahmetjanov.