Almaty oblysynyń polıseıleri IIM kıberqylmysqa qarsy is-qımyl departamenti men óńir prokýratýranyń úılestirýimen alaıaqtyq jolmen alynǵan aqshany krıptovalıýtaǵa aýdarýmen aınalysqan uıymdasqan dropperler tobynyń qyzmetin toqtatty.
Tergeý barysynda 20-dan asa alaıaqtyq shemanyń qatysýshysy anyqtaldy. Olardyń arasynda droptar, drop-jetekshiler, kýratorlar jáne menedjerler bar.
«Árbir qatysýshy 5-7 banktik shotty paıdalanyp, árbir tranzaksııadan 1%-dan 3%-ǵa deıin syıaqy alyp otyrǵan. Jańa droptardy jınaý Telegram-arnalary arqyly júzege asyrylǵan. Jedel is-sharalar nátıjesinde 8 mln teńgeden asa somadaǵy qarjy qozǵalysy toqtatylyp, shemanyń uıymdastyrýshysyna tıesili aı saıynǵy aınalymy 100 mln teńgeden asatyn krıptokoshelıok anyqtaldy. Qazirgi ýaqytta bankterden qarjy operasııalary týraly aqparat alý úshin sanksııalanǵan suranys hattar joldandy. Anyqtalǵan aktıvterdi tárkileý máselesi qarastyrylyp jatyr», dep habarlaıdy Almaty oblystyq polısııa departamentiniń bastyǵy, polısııa polkovnıgi Meıram Ábikeev.
Jedel-izdestirý sharalary barysynda jeti adam, onyń ishinde úsh kýrator, bir menedjer jáne úsh dropper ustaldy. Barlyǵy ýaqytsha ustaý ızolıatoryna qamaldy.
Quqyq qorǵaý organdary azamattardy saq bolýǵa, banktik shottardy tirkeý nemese beıtanys adamdardan qarjylyq operasııalarǵa qatysý týraly kúmándi usynystardan bas tartýǵa shaqyrady.
«Mundaı áreketter alaıaqtyq shemalarǵa qatysý retinde qarastyrylyp, qylmystyq jaýapkershilikke ákep soǵýy múmkin. Eger siz osyndaı qyzmettiń qurbany nemese kýágeri bolsańyz, dereý polısııaǵa habarlasyńyz», dep eskertedi polısııa ókilderi.
Almaty oblysy