AQTAÝ. 18 maýsym. Kaspıı teńizinde zańsyz balyq aýlaǵan daǵystandyqtar ustaldy. Olardyń birine shekarashylardyń qaıyqtyń motoryna atqan oǵy tıip, jaraqatandy. Bul týraly egemen.kz tilshisi habarlady.
Kaspıı teńizindegi shekarany kúzetip júrgen Shekara qyzmetiniń sarbazdary kezekti barlaý kezinde zańsyz balyq aýlap júrgen brakonerlerdi anyqtady. «Toqta!» degen buıryqqa motorly qaıyqqa mingen úsh adam qulaq aspaǵan kúıi Reseı terrıtorııasy jaqqa qashyp, boı tasalamaq bolypty. Olardy toqtatý maqsatynda shekarashylar qaıyqtyń motoryna qaraı oq atqan. Nátıjesinde sý kóliginiń eki qozǵaltqyshy isten shyǵyp, sondaı-aq, brakonerlerdiń biri jaraqattanady. Shekarashylardyń aıtýynsha, ol Reseıdiń Daǵystan Respýblıkasynyń azamaty eken.
Moıyn tusynan jaralanǵan brakoner dereý Aqtaý qalasyndaǵy oblystyq aýrýhanaǵa jetkizilgen. «Qazirgi jaǵdaıy birqalypty, ómirine qaýip joq», – deıdi dárigerler.
Al zań buzýshylardyń qaıyǵyn tekserý barysynda 12 qap aý, 4 bóshke janarmaı jáne 3 uıaly telefon tárkilendi.
Gúlaıym Shyntemirqyzy.
Derek, sýret: egemen.kz.