Qazaqstan musylmandary dinı basqarmasy Pátýá bóliminiń mamandary sýret salýǵa qatysty resmı úkim shyǵardy, dep habarlaıdy Egemen.kz.
Sýret - ártúrli boıaýlarmen: akvarelmen (qaǵazǵa nemese karton), maıly boıaýmen (holstqa, kartonǵa, aǵashqa), pastelmen (erekshe túrli-tústi qaryndashtarmen qaǵazǵa nemese kartonǵa) salynatyn óner túri.
Ǵalymdar sýret salýdyń úkimin ekige bólip qarastyrady:
Jansyz zattardyń sýretin salý. Tórt mázhabtyń (hanafı, málıkı, shafıǵı, hanbalı) ǵalymdary jansyz nárselerdiń sýretin salýǵa ruqsat etilgendigine biraýyzdan kelisken.
«Ibn Abbastan jetken rıýaıatta sýret salýshyǵa: "Budan basqa jumys jasaı almasań, myna aǵashtyń sýretin nemese kez kelgen jansyz zatty beınele" degen», delingen jazbada.
Tiri jannyń sýretin salý. Bul - ǵulamalardyń arasynda tartysty taqyryp. Jumhýr (hanafı, shafıǵı, hanbalı) ǵalymdary tiri jannyń tolyq beınesin salýǵa tyıym salǵan.
«Paıǵambarymyz Qııamet kúni qatty azapqa tartylatyndar - sýretshiler, degen. Málıkı mázhabynyń jáne zamanymyzdyń kóptegen ǵalymy kóleńkesi joq jany bar nárselerdiń sýretterin salýǵa ruqsat beredi. Sebebi Paıǵambarymyzdyń kezinde kóleńkesi joq sýretterdi qoldanǵany týraly rıýaıattar kelgen. Tek ony keıbir sebepterge baılanysty ǵana quptamaǵan. Al sýret salýǵa tyıym salynǵan hadısterdi kóleńkesi bar sýretterge qatysty kelgen dep túsindiredi», delingen habarlamada.
Dese de, ǵalymdar sýret salýǵa tyıym salynǵan hadısterdiń quramyna jany bar nárseniń beınesindegi oıynshyqtardyń kirmeıtinin aıtqan. Sebebi onyń balanyń jaqsy ósip, qalyptasýyna jáne bala tárbıesine paıdasy mol.
«Osy rette zamanymyzdyń ǵalymdary oıynshyqqa salystyryp, bilim berý maqsatynda jany bar nárseniń sýretin salýǵa ruqsat bergen. Sondaı-aq tárbıelik máni bar, paıdaly, sharıǵattyń qaǵıdattaryna qaıshy kelmeıtin mýltfılmderdi shyǵarýǵa da ruqsat etiledi», delingen habarlamada.
Sheshim:
Jansyz zattyń sýretin salýǵa ruqsat etiledi.
Bilim berýde, ǵylymı maqsatta jany bar nárseniń sýretin salýdyń oqasy joq.
Tárbıelik máni bar, sharıǵattyń qaǵıdattaryna qaıshy kelmeıtin mýltfılmderdi shyǵarýǵa bolady.
Paıǵambarlardyń beınesin beıneleý - haram.