ORAL. 18 maýsym. Batys Qazaqstan oblysy tótenshe jaǵdaılar departamenti jedel qutqarý jasaǵynyń qyzmetkerleri Shalqar kólinde tórt demalýshyny qutqardy. Bul týraly Batys Qazaqstan oblysy tótenshe jaǵdaılar departamentiniń memlekettik til jáne aqparat toby taratqan málimdemege silteme jasaǵan egemen.kz tilshisi habarlady.
Oral qalasynyń 25-35 jas aralyǵyndaǵy eki er jáne eki áıel adam kólge dem alýǵa kelgen. Olar úrmeli arnaıy buıymda kúnge qyzdyrynyp jatyp, jaǵadan qalaı alystap ketkenin baıqamaı qalǵan.
Batys Qazaqstan oblysy tótenshe jaǵdaılar departamenti jedel qutqarý jasaǵynyń №2 Shalqar beketiniń qutqarýshylary Erbol Hangereev pen Nurhan Jolahov bekitilgen aýmaqty patrýldeýdi aıaqtaı kelgende, jaǵadan 800 m qashyqtyqta shyjyǵan kún astynda ashyq kóldegi tórt adamdy baıqap, olardy dereý jaǵalaýǵa jetkizdi.
Qutqarýshylardyń aıtýynsha, mundaı jaǵdaı demalýshylardyń turmysta uıyqtaýǵa qoldanatyn úrmeli matrasty kólde qoldaný kezinde jıi tirkeledi. Sebebi, mundaı buıymdar jeńil bolyp keledi eken.
Shalqar kóli tek Qazaqstannyń ǵana emes, sondaı-aq, ońtústik-shyǵys Eýrazııanyń iri kólderiniń biri. Aýmaǵy 14-19 sharshy shaqyrymdy alyp jatqan kóli Aqjaıyq óńirindegi kórikti mekenderdiń biri. Tek oraldyqtardyń ǵana emes, sondaı-aq, Qazaqstannyń kórshi oblystary men Reseıden sý quramy teńiz sýyna uqsas tuzdy kólde densaýlyqtaryn qalpyna keltirýge kóptep adamdar keledi.
Demalýshylardyń kóptigine baılanysty kól jaǵalaýynda apatqa ushyraǵan adamdardy qutqarýǵa qajetti jabdyqtarmen jasaqtalǵan beket qyzmet etedi. Búginge deıin qutqarýshylar talaı ret adamdardy ajaldan arashalap qaldy.
Temir Qusaıyn.
Derek: egemen.kz.
Sýret: nur.kz.