Oblystyq «Zerde» baıqaýynda Mamlıýt aýdanyndaǵy Beloe aýylynyń 7-synyp oqýshysy Veronıka Pechenkına ózi oılap tapqan «Android»-qa salatyn «Magic Dictionary» qosymshasyn usynyp, júldegerler qatarynan kórindi.
Bul qosymsha aǵylshyn tilindegi «English Plus 5» oqýlyǵyna engizilgen sózderdi aýdarǵanda, olardyń golografııalyq sýretin birge kórsetedi. Sondaı-aq onyń qalaı aıtylatynyn aýdıo arqyly naqyshtap beredi. Sóıtip, sózder tárjimelengende onyń ne ekeni jáne qalaı aıtylýy da birge kórsetilip, ony este saqtap qalý múmkindigin arttyrady. «Bul ádis aǵylshyn tilin úırenýshilerdiń qyzyǵýshylyǵyn týǵyzdy. Mysaly, kóptegen adam aýdarylǵan sózderdi umytyp qalady. Al bul sýret arqyly jáne aǵylshynsha taza aıtylýy jaǵynan este qalady», deıdi qazylar alqasynyń músheleri.
Bul ádisti qalaı oılap taptyń degen suraqqa oqýshynyń ózi bylaı jaýap berdi: «Birde sabaq ústinde aǵylshyn tiliniń muǵalimi Natalıa Aleksandrovna oqýshylarǵa 3D gologrammalyq sýretterdi kórsetti. Sol kezde maǵan osy ádisti aǵylshyn sózderine de qoldanýǵa bolady eken-aý degen ıdeıa keldi. Sonda úırenýshiler sózderdi estiń jadymen ǵana emes, kózben de eske ustap qalady dep oıladym. Sóıtip, besinshi synyptan bastap, ony ózimizdiń ınformatık aǵaıdyń jetekshiligimen jasaýǵa kiristim», deıdi ol.
Qazir Veronıkanyń ádisin qoldanýshylar kóbeıip kele jatqan kórinedi. Bul qosymshany avtor ustazymen birge úsh jyl boıy ázirlegen. Avtorlar áli de ony jetildire túsýdi kózdeıdi. Ony «Play Market»-ten kod arqyly júktep alýǵa bolady.
Soltústik Qazaqstan oblysy