Almaty oblysynda halyqty jumyspen qamtý baǵytyndaǵy jumys qarqyndy júrip jatyr. Tek keıingi bir aptada óńirde 995 jańa jumys orny ashylyp, 420 adam turaqty jumysqa ornalastyryldy.
Eń kóp jumys orny – bilim salasynda. 112 muǵalim men tárbıeshi mektepter men balabaqshalarǵa jumysqa qabyldandy. Jańa mamandardyń basym bóligi Qarǵaly aýylyndaǵy №1 mektep-lıseıge, Raıymbek aýdanyndaǵy balalar-jasóspirimder sport mektebine, Á.Beıseýov atyndaǵy orta mektepke ornalasqan.
Densaýlyq saqtaý salasy da jańa kadrlarmen tolyqty. Almaty oblystyq balalar klınıkalyq aýrýhanasy men arnaıy áleýmettik qyzmet kórsetý ortalyǵyna 45 medısınalyq maman jumysqa alyndy.
Budan bólek, kólik, qoıma sharýashylyǵy salasyna – 65, ónerkásipke – 24, balyq sharýashylyǵyna – 15, qurylysqa 10 adam jumysqa qabyldandy.
О́ńirdegi «Jetisý volframy» JShS, «Tóre jaılaý» JShS, sondaı-aq bilim, densaýlyq saqtaý uıymdary negizgi jumys berýshi sanalady. Jańadan ashylǵan 995 jumys ornynyń 567-si sýbsıdııalanǵan, 428 bos jumys orny enbek.kz portalyna jarııalandy.
«Jańa jumys oryndaryn ashý – basty mindetimiz. Jumys berýshilermen tyǵyz baılanystamyz, jumys izdeýshilerge qolaıly bos oryndardy tańdaýǵa kómektesemiz. Árbir azamattyń turaqty jumyspen qamtylyp, otbasyn asyraýǵa múmkindigi bolýy mańyzdy», degen oblystyq jumyspen qamtý jáne áleýmettik baǵdarlamalar basqarmasynyń basshysy Aıgúl Matanqyzy bul baǵyttaǵy jumystyń jalǵasatynyn atap ótti.
Bıyl Almaty oblysynda 61,2 myń jańa jumys ornyn ashý josparlanyp otyr. Bul shara halyqtyń jumyspen qamtylýyn arttyryp, óńirdiń ekonomıkalyq damýyna sony serpin beredi.
Almaty oblysy