Qazaqstan Prezıdenti janyndaǵy Ortalyq kommýnıkasııalar qyzmetinde «Barshaǵa arnalǵan qazirgi zamanǵy memleket» – 100 naqty qadam Ult josparyn iske asyrý turǵysynda etnomádenı birlestikterdiń qyzmeti týraly» taqyrybynda brıfıng ótti.
Sharaǵa QHA Keńesiniń músheleri, atap aıtsaq, Qazaqstan nemisteriniń «Vozrojdenıe» qaýymdastyǵy» qoǵamdyq birlestiginiń tóraǵasy Aleksandr Dederer, Qazaqstan túrikteriniń «Ahyska» qoǵamy» qoǵamdyq birlestiginiń tóraǵasy Zııatdın Kasanov, Astana qalasyndaǵy «Zlata» bolgar etnomádenı birlestiginiń tóraıymy Olga Andrıevskaıa, «Qazaqstan kúrdteriniń «Barbang» qaýymdastyǵy» respýblıkalyq qoǵamdyq birlestiginiń tóraǵasy Knıaz Mırzoev, Prezıdent Ákimshiligi Qazaqstan halqy Assambleıasy Hatshylyǵynyń sektor meńgerýshisi Názıpa Shanaı qatysty.
Jıyn barysynda «Barshaǵa ortaq qazirgi zamanǵy memleket» – 100 naqty qadam Ult josparyn iske asyrý mán-mátininde etnomádenı birlestikterdiń qyzmeti týraly» baıandalyp, Qazaqstan halqy Assambleıasy jylynyń aralyq qorytyndylary týraly, QHA jylyn uıymdastyrý jáne ótkizý jónindegi memlekettik komıssııanyń alda bolatyn májilisi týraly aıtyldy. 20 jyl ishinde Assambleıa N.Á.Nazarbaevtyń etnosaralyq toleranttylyq pen qoǵamdyq kelisimniń qazaqstandyq úlgisin qalyptastyrýda bedeldi býynǵa aınalǵany atap kórsetildi.
Búginde respýblıkada 960-tan astam etnomádenı birlestik bar, sonyń ishinde 29-y – respýblıkalyq etnomádenı birlestik eken. 11 Dostyq úıi, Almatyda respýblıkalyq Dostyq úıi jumys istep tur. Jyl sońyna deıin Aqtaý, Qyzylorda, Oral qalalarynda Dostyq úıleri ashylatyn bolady.
Assambleıanyń bastamasymen oblystyq, qalalyq, aýdandyq jáne aýyldyq deńgeılerde, sondaı-aq, iri kásiporyndardyń ujymdarynda Qoǵamdyq kelisim keńesteri men otbasynda toleranttylyqty tárbıeleý máseleleri jónindegi Analar keńesteri quryldy. Qoǵamdyq kelisim keńesteriniń sany – 1470, otbasynda toleranttylyqty tárbıeleý máseleleri jónindegi Analar keńesteriniń sany – 163-ke jetti. 14 joǵary oqý ornynda Qazaqstan halqy Assambleıasynyń kafedrasy ashyldy.
Parlament Májilisinde de QHA-nyń depýtattyq toby jumys isteıdi. V shaqyrylymdaǵy QHA depýtattyq toby osyǵan deıin 38 otyrys ótkizip, 6 zań jobasyna bastamashylyq jasady. 151 depýtattyq saýal jarııa etilse, olardyń 317-si birlesken depýtattyq saýaldar. Azamattardyń 1511 jazbasha ótinishterin qarady. QHA-nyń depýtattyq toby 472 eldi mekenge baryp, halyqpen 1199 kezdesý ótkizdi, 1422 adamdy jeke qabyldady.
QHA jyly aıasynda túrli baǵyttaǵy is-sharalar, onyń ishinde «QHA – 20 izgi is» aksııasy jyl sońyna deıin jalǵasady.
Raýshan TÁÝIRHANQYZY,
jýrnalıst.
ASTANA.