Narhoz ýnıversıtetinde Qyzyl jarty aı qoǵamynyń elimizdegi qyzmetine qatysty dóńgelek ústel ótti, dep habarlaıdy Egemen.kz.
Qyzyl jarty aı qoǵamy qazirgi kezde elimizdiń 17 óńirinde jumys isteıdi. Ári elimizdegi jalǵyz resmı gýmanıtarlyq uıym, onyń negizgi mindeti – jaralanǵandar men naýqastardy tasymaldaý jáne emdeý, sondaı-aq tabıǵı jáne tehnogendik apattar kezinde shuǵyl kómek kórsetý. Bul uıymnyń qyzmeti 1949 jylǵy Jeneva konvensııalary men olardyń qosymsha hattamalarynda, sondaı-aq BUU Bas assambleıasynyń qararlarynda bekitilgen.
Bul is-shara Qazaqstandaǵy Qyzyl jarty aı qoǵamy týraly zańdy qabyldaýdyń mańyzdylyǵyn talqylaýǵa arnaldy. Halyqaralyq tájirıbege súıensek, onyń quqyqtyq mártebesin zańdy túrde bekitý qoǵamnyń tıimdi jumys isteýin qamtamasyz etedi. Qazaqstan bul turǵyda áli de artta qalyp otyr. Dóńgelek ústelge HQKK Ortalyq Azııadaǵy óńirlik delegasııasynyń basshysy Bılıana Mıloshevıch, HQKK Qazaqstandaǵy mıssııasynyń basshysy S.Saǵymbaev, Qyzyl aı qoǵamynyń prezıdenti E. Arǵymbaev, Parlament Májilisiniń depýtaty I.Smırnova jáne basqalar qatysty.
Ortalyq Azııadaǵy óńirlik delegasııasynyń basshysy Bılıana Mıloshevıchtiń aıtýynsha, halyqaralyq gýmanıtarlyq quqyq – bul qarýly qaqtyǵystar kezinde beıbit turǵyndardy, medısınalyq qyzmetkerlerdi, áskerı tutqyndardy qorǵaýǵa jáne soǵys júrgizýdiń ádisterin retteýge arnalǵan quqyqtyq júıe. Onyń negizgi maqsaty – qarýly qaqtyǵystardyń saldaryn jeńildetý, zańdy áskerı is-qımyldar men adamgershilik qaǵıdattarynyń arasyndaǵy tepe-teńdikti saqtaý. Bul quqyqtyń tamyry tereńge ketedi. Ol ejelgi órkenıetter men dinı normalardan bastaý alyp, búgingi kúnge deıin damyp, qazirgi tańda onyń negizi 1949 jylǵy Jeneva konvensııalarynda jáne olardyń qosymsha hattamalarynda bekitildi.
Qazaqstandaǵy Qyzyl jarty aı qoǵamy prezıdenti Erjan Arǵymbaevtyń aıtýynsha, qoǵamnyń tótenshe jaǵdaılarǵa den qoıýy jáne qalpyna keltirý baǵdarlamalary sheńberinde kóptegen kómek kórsetken. «Qoǵamdyq birlestikter týraly» zańmen retteledi, bıýdjetten qarjylanbaıdy. Uıym tabıǵı, tehnogendik jáne basqa da tótenshe jaǵdaılar kezinde kómek kórsetý operasııalaryna qatysqan. Sońǵy tórt jylda sý tasqyny, órt, jarylys, qurǵaqshylyq jáne basqa da tótenshe jaǵdaılardan zardap shekken 65 myń adamǵa kómek kórsetilgen.
«Basty maqsatymyz – tótenshe jaǵdaılarǵa jedel áreket etip, zardap shekken azamattarǵa shuǵyl kómek kórsetý. Osyǵan baılanysty biz birneshe baǵytta jumys isteımiz: gýmanıtarlyq kómek kórsetý, apattardyń aldyn alý jáne qoǵamdy tótenshe jaǵdaılarǵa daıyndaý. Mysaly, eldegi tótenshe jaǵdaıda otbasylyq baılanystardy qalpyna keltirýge kómektestik. Sonymen qatar, qabyldaý-taratý ortalyqtarynda bolǵan mıgranttardy gıgıenalyq quraldarmen qamtamasyz ettik. Qyrǵyzstan, О́zbekstan jáne Reseı azamattaryna sheteldegi otbasylarymen baılanys ornatýǵa járdemdestik. Osy jumystardyń aıasynda 60-tan astam ótinish qarastyrylǵan. Sondaı-aq, Halyqaralyq Qyzyl krest komıtetimen jáne Qyrǵyz Respýblıkasynyń Qyzyl jarty aıymen birlesip, 78 Qyrǵyzstan azamatynyń óz otanyna oralýyn uıymdastyrdyq» deıdi qoǵam prezıdenti.
Qyzyl jarty jaı qoǵamy bıyl strategııasyna sáıkes, klımattyń ózgerýinen týyndaıtyn apat qaýpin azaıtý jáne onyń saldaryn jeńildetý jobalaryn júzege asyryp jatyr.
Uıym álem boıynsha 190-nan astam elde jumys istep, tabıǵı apattar men qarýly qaqtyǵystar kezinde mıllıondaǵan adamdarǵa qoldaý kórsetti. Byltyr 27 qyrkúıekte Nıý-Iorktegi BUU shtab-páterinde Qazaqstan, Brazılııa, Iordanııa, Qytaı, Fransııa jáne Ońtústik Afrıka memleketteri Halyqaralyq Qyzyl Krest komıtetimen birlesip, jahandyq halyqaralyq gýmanıtarlyq quqyqqa qatysty saıası mindettemelerdi jandandyrý boıynsha bastama kótergen bolatyn. Bul bastama Jeneva konvensııalaryna adaldyqqa baǵyttalǵan.
Sharada Jeneva konvensııalary qundylyqtaryn Qazaqstan zańnamasyna engizý máseleleri qarastyrylyp, qoǵamnyń quqyqtyq negizderin nyǵaıtýǵa arnalǵan naqty usynystar ázirlendi. Bul bastama halyqaralyq jáne ulttyq deńgeıde gýmanıtarlyq quqyqtyń rólin kúsheıtýge, osal toptarǵa kómek kórsetýge, beıbitshilik pen qaýipsizdikti saqtaýǵa baǵyttalǵan. Qyzyl jarty aı qoǵamynyń jumysy bolashaqta elimizdegi gýmanıtarlyq qyzmetterdiń tıimdiligin arttyrýǵa yqpal etedi dep kútiledi.