ASTANA. 6 aqpan. Tennısten Federasııa kýbogy jarysynda Qazaqstan Azııa jáne Muhıt aımaǵy elderi saıysynyń birinshi tobynda fınalǵa shyqty. Bul týraly egemen.kz habarlady.
Qytaıdyń Gýanchjoý qalasynda ótip jatqan jarysta otandyq tennısshiler óz tobyndaǵy sheshýshi úshinshi oıyndy Taıland qyzdaryna qarsy ótkizdi. Alǵashqy oıynda elimizdiń ekinshi raketkasy Iаroslava Shvedova qarsylasy Peantaný Plıpýechten basym tústi. Birinshi sette Slava taı-breık arqyly jeńse, kelesi kezeńde taı qyzynyń basymdyǵy tirkeldi. Desek te, sheshýshi sette Shvedova qarsylasyna eki upaı ǵana ustatyp, oıyndy 6:7, 7:5, 6:2 esebimen óz paıdasyna aıaqtady.
Ekinshi oıynda qazaq tennısiniń jaryq juldyzy, elimizdiń birinshi nómirli tennısshisi Zarına Dıas Taıland senim artqan Nıche Letpıtaksınchaıdy tas-talqan qylyp jeńdi. Eki kezeńge sozylǵan oıynda Zarına qarsylasyna eshqandaı upaı bermedi. Nátıjesinde, bizdiń qyzdyń paıdasyna 6:0, 6:0 esebi tirkelip, jarys barysynda Qazaqstan úshinshi oıyn qatarynan merziminen buryn jeńiske jetti.
Juptyq kezdesýde elimizdiń atynan ádettegideı Kámılá Kerimbaeva men Iýlııa Pýtınseva kortqa shyqty. Al Taıland tarapynyn Lýksıka Kýmhým men Tamarıne Tanasýgarn juby synǵa tústi. Bizdiń qyzdar alǵashqy sette ese jibergenimen, ekinshi kezeńde jalpy eseptegi tarazy basyn teńestirgen edi. Úshinshi sette taı qyzdarynyń mereıi ústem bolyp, 6:3, 1:6, 6:3 esebimen basymdyq tanytty.
Desek te, Dıas Dosqaraev jattyqtyratyn Qazaqstan «V» tobynda barlyq qarsylastaryn qapy qaldyryp, úzdik atandy. Soǵan sáıkes II Álemdik toptyń pleı-off satysyna beriler joldamaǵa talasýǵa múmkindik aldy. Bul synda bizdi «A» tobynyń jeńimpazy Japonııa qyzdary kútip tur. О́z kezeginde olar Ońtústik Koreıa, qytaılyq Gonkong jáne О́zbekstan quramalaryna qarsy oınap, barlyq tartysta 3:0 esebimen jeńdi. Eger qyzdarymyz Japonııany da aınalyp óter bolsa, II Álemdik topta sońǵy oryn alǵan komandamen atalǵan satynyń joldamasyn sarapqa salady. Japonııamen oıyn 7 aqpan kúni ótedi.
Elaman Qońyr.
Derek: egemen.kz.
Sýret: ktf.kz.