Saran ındýstrıaldy aımaǵynda ornalasqan «Silk Road Electronics» turmystyq tehnıka shyǵaratyn zaýyt álemdik brend «Samsung Electronics» kompanııasymen elimizde teledıdar óndirý týraly kelisimge qol qoıdy.
Ortaq kelisim sapaly «Samsung» teledıdarlarynyń jelisin shyǵarýdy kózdeıdi. Jańa óndiris jelisi «Silk Road Electronics» kásipornynda qurylady. Álemdik brendti óndirýge zaýyttyń áleýeti tolyq jetedi. Bul arqyly elimizdiń, tipti Orta Azııanyń joǵary tehnologııalyq ónimge degen suranysy óteledi.
Sony joba О́nerkásipti damytý qorynyń qoldaýymen júzege asyrylyp otyr. О́ndiristik jelini iske qosý osy jyldyń ekinshi toqsanyna josparlanǵan. Al tutynýshylar kelesi jyldyń ekinshi jartyjyldyǵynda Sarannan shyqqan «Samsung» teledıdarlaryn satyp ala alady. Bul bastama – óńirimizdiń turmystyq tehnıka óndirý salasyndaǵy taǵy bir mańyzdy qadam.
«Silk Road Electronics» zaýytynyń dırektory Aleksandr Krıtskııdiń aıtýynsha, bul yntymaqtastyq jergilikti kásiporyn ári tutastaı alǵanda elimizdiń ónerkásiptik damýy úshin jańa múmkindik jolyn ashady. «Samsung Electronics» kompanııasymen birlesip, biz otandyq tutynýshylar úshin qoljetimdi baǵamen álemdik deńgeıdegi ónimderdi usynamyz», deıdi zaýyt basshysy.
Jańa jobanyń ónerkásiptik ınfraqurylymdy damytyp, jańa jumys oryndaryn qurýǵa da yqpaly bar.
– «Samsung Electronics» elektronıka salasyndaǵy kópjyldyq tehnologııalyq kóshbasshy bolyp tanylysymen, eń jańa tehnologııa men biregeı paıdalanýshy tájirıbesin toptap, óz tutynýshysyna barynsha jaqyn bolýǵa umtylady. Elimizde óndiristiń bastaý alýy bizdiń kompanııa úshin mańyzdy ról atqarady. Bul bizdiń ónimimizdiń jergilikti naryq úshin qoljetimdiligin arttyrýǵa teńdessiz múmkindik syılaıdy, – deıdi «Samsung Electronics» Ortalyq Eýrazııa prezıdenti Djong Iýdjın.
«Silk Road Electronics» pen «Samsung Electronics» kompanııalarynyń birlesken jumysy óńirdiń óndiristik áleýetin ǵana arttyryp qoımaıdy, eldiń ındýstrıaldyq ınfraqurylymyn nyǵaıtyp, joǵary tehnologııalyq ónimderdiń otandyq óndirisin óristetedi.
Qazirgi ýaqytta kásiporyn «Artel» brendimen teledıdar, elektrli sý jylytqysh, shańsorǵysh, asúı toqpeshi, aýasorǵysh, kir jýatyn mashına, jeldetkish sekildi turmystyq tehnıka túrlerin shyǵaryp jatyr. Búginniń ózinde 130 myń tehnıka sátti saýdalandy. Kásiporyn ónimderin saýda jelileri men ınternet arqyly ótkizip otyr. Ásirese «Kaspi.kz» qosymshasy sekildi onlaın saýda platformalaryn tıimdi paıdalanady. Satý bólimi menedjerleriniń biliktiligi arqasynda TMD elderine de eksporttaıdy. Bul – kompanııanyń alǵa qoıǵan basty maqsaty. Eger shetel naryǵyna shyqsa, onda kásiporyn mol tabysqa kenelip, myńdaǵan jumys ornyn ashýǵa múmkindik týady.
Kompanııa – elimizdegi turmystyq tehnıka shyǵaratyn jalǵyz óndiris orny. Endi «Samsung» markaly teledıdarlaryn naryqqa shyǵarsa, onda zaýyt tirshiligi tipti serpiledi.
– Bizdiń kompanııa álemdik naryqqa energııaǵa tıimdi, paıdalanýǵa óte yńǵaıly turmystyq tehnıkany shyǵaryp jatyr. Qyzmetkerlerimiz óndiris kezinde tehnıkalyq ınnovasııalardyń ıgiligin kádege jaratýǵa umtylady. О́nim kópshilik talǵamynan shyǵyp, kózge tartymdy kóriný úshin dızaınyna da erekshe mán beremiz. Álemdik brend qalyptastyrý maqsatynda tájirıbemizdi árdaıym tolyqtyryp, izdenisten qol úzbeımiz. Bizdiń kompanııany kóp jumys kútip tur. Otandyq brendti kúni erteń álem moıyndap jatsa, onda Qaraǵandynyń da, Sarannyń da óndirisi ulǵaıady, – deıdi seriktestiktiń qoǵam jáne memlekettik mekemelermen baılanys basqarmasynyń jetekshisi Dılıara Talǵatqyzy.
Qaraǵandy oblysy