Almaty oblysynda halyqty jumyspen qamtyp, óziniń mamandar daıyndaıtyn oqý ortalyǵymen erekshelenetin «Bent» kompanııalar toby temir-beton shpaldaryn, avtoklavty gaz bloktaryn, qıyrshyq tas pen rels bekitkishterin óndiredi. Sondaı-aq táýelsiz zerthanada sertıfıkattaý qyzmeti kórsetiledi. «Bent» fırmasy ónerkásiptik óndiris baǵytynda jumys isteıdi. Búginde zaýyttyń bazasynda birneshe kásiporyn jelisi bar. Onda jyl saıyn jańa jumys oryndary ashylyp, jumysshy mamandardyń eńbekke aralasýyna mol múmkindik jasalyp otyr.
О́tken jyly kompanııa 8 mlrd teńgeden astam salyq tólegen. Sonymen qatar 400-den astam jumys orny qurylyp, jumysshylardyń jalaqysy 380 000 teńgege deıin ósken. Zaýyttaǵy barlyq kásiporynda sıfrlandyrý, jańǵyrtý jáne avtomattandyrý jumystary júrgizilgen. TMD elderine eksportty keńeıtý maqsatynda Qyrǵyzstan, О́zbekstan jáne Reseımen baılanys ornatylǵan.
Bıylǵy Jumysshy mamandyqtary jylyna oraı, tabysy tasqyndaǵan kásiporynda «Ashyq esik» kúni uıymdastyryldy. Is-sharaǵa óńirdegi 6 tehnıkalyq kolledjden 30 shaqty stýdent shaqyryldy. Almaty oblystyq jumyspen qamtýdy úılestirý jáne áleýmettik baǵdarlamalar basqarmasy men bilim basqarmasy birlese uıymdastyrǵan basqosýdyń basty maqsaty – jastardyń mamandyqty durys tańdaýyna, sondaı-aq jumysqa ornalasýyna baǵyt-baǵdar berý.
Búgingi tańda oblysta 40 kolledj jumys isteıdi, onyń 25-i jumysshy mamandyqtar boıynsha oqytady.
«Ásirese tehnıkalyq mamandyqtarda oqıtyn stýdentterge basymdyq berip otyrmyz. О́ıtkeni Ile aýdanynda óndiris oryndary kóptep sanalady. Sondyqtan stýdentterdi zaýyttardyń jumys yrǵaǵymen tanystyryp ári qyzyqtyrý úshin oqý oryndarymen birlesip, osyndaı sharalar ótkizip turamyz», deıdi Ile aýdany ákiminiń orynbasary Qýat Aqshabaev.
Almaty oblysynda barlyq jumys isteıtin adamdardyń jartysynan astamynda kásiptik nemese tehnıkalyq bilimi bar, 360 myń adam 500-den astam jumysshy mamandyǵymen jumys isteıdi. Jumysshy kadrlar kólik, saýda, ónerkásip, qurylys jáne aýyl sharýashylyǵy salasynda suranysqa ıe.
Sonymen birge boljamdar aldaǵy jyldary jumys kúshine degen qajettilik tek arta túsetinin kórsetip otyr. Taıaýdaǵy 6 jylda kadrlarǵa suranystyń jalpy sany – 240 myń adam, onyń ishinde kásiptik-tehnıkalyq bilimi bar jumysshylardyń jartysynan astamy ıaǵnı 60 myńǵa jýyǵy jumysshy mamandyqtar ıelerine tıesili. Sondyqtan jumysshy mamandyqtardy damytý – óńirdiń bolashaǵyna, tehnologııalyq jáne ekonomıkalyq damýyna aıryqsha yqpal etpek.
Bul oraıda alǵa qoıǵan maqsat ta aıqyn. Jumysshy mamandyqtary jylyna arnalǵan is-sharalar jospary aıasynda jumys berýshilerdiń suranysy boıynsha kásiptik oqytýǵa jáne jumys ornynda oqytýǵa erekshe nazar aýdarylatyny ataldy. Bıylǵy jyly 860-qa jýyq adamdy oqý ortalyǵynda jáne jumys berýshiniń jumys ornynda jumysshy mamandyqtar boıynsha qysqamerzimdi oqytýdan ótkizý josparlanǵan.
«Jumysshy mamandyqtardy damytý jáne qoldaý – memlekettiń, bıznestiń, bilim berý mekemeleri men qoǵamnyń birlesken kúsh-jigerin talap etetin strategııalyq mańyzdy mindet ekenin atap ótkim keledi. Biz qazirdiń ózinde joǵary bilikti kadrlardy daıarlaýǵa jaǵdaı jasap, jumysshy mamandyqtardyń ımıdjin jaqsartyp, oqytýdyń zamanaýı tehnologııalaryn engize otyryp, osy baǵytta eleýli qadamdar jasap jatyrmyz», deıdi Almaty oblystyq jumyspen qamtý jáne áleýmettik baǵdarlamalar basqarmasynyń basshysy A.Ahmetova.
Temirden túıin túıgen kásiporynnyń jumys yrǵaǵymen tanysqan stýdentter jumysshy mamannyń qadir-qasıeti men mártebesin sezinip, óz isinde tabandylyq tanytyp júrgen aldyńǵy tolqyn aǵalardyń aqyl-keńesine qanyqty.
«Zaýytqa 2006 jyly slesar mamandyǵymen jumysqa kelgenmin. Jıyrma jyl eńbek etip, osy kúni bas mehanıkpin. О́zim jetekshilik etetin jóndeý sehynda 40 adam jumys isteıdi. Olardyń arasynda temir pisirýshi, slesar, tokar syndy mamandar bar. Jumysshylardyń tabandy eńbek etýiniń arqasynda abyroı bıiginen kórinip kelemiz», dedi bas mehanık Arman Jaqypbekov.
«Ashyq esik» kúninde kompanııa basshylyǵy men 6 kolledj ujymy ózara yntymaqtastyq memorandýmyna qol qoıdy.
Oblysta osy kúni jumyssyz adamdar sany 33 myń bolsa, onyń ishinde 10 myńǵa jýyǵy NEET sanatyndaǵy jastar. Olardy qysqa merzimde oqytyp, jumysqa tartý úshin «Bent» JShS syndy kompanııalarǵa artylar úmit zor.
О́ıtkeni atalǵan óndiris oshaǵynda jumysshy mamandardy baýlıtyn arnaıy óndiristik oqytý ortalyǵy baryn aıttyq. Ortalyq osy ýaqytqa deıin ózderine 100 shaqty maman tárbıelep shyǵarǵan eken. Kompanııa ókilderi óz kezeginde taǵy 60 jumysshy mamanǵa suranys baryn atady.
Almaty oblysy,
Ile aýdany