Elimizde qosylǵan qun salyǵyna (QQS) qatysty pikirler usynysy talqylanyp jatyr. Memleket basshysy Qasym-Jomart Toqaev máselege qoǵamnyń, bıznes-qaýymdastyqtyń pikiri eskeriletinin aıtty.
Keshe Úkimettiń ekonomıkalyq bloginiń delegasııasyn Almatyǵa bastap kelgen Premer-mınıstrdiń orynbasary – Ulttyq ekonomıka mınıstri Serik Jumanǵarın eldegi bıznes nysandarynyń 65 paıyzy Almatyda ekenin, osy máselege qatysty qoǵamdyq pikir de Almatyǵa qarap kósh túzeıtinin aıtty.
Sondaı-aq kezdesýge Qarjy mınıstri Mádı Takıev, Ulttyq ekonomıka vıse-mınıstri Azamat Ámirın, «Atameken» UKP basqarma tóraǵasy Raıymbek Batalov, Jeńil ónerkásip qaýymdastyǵy, týrıstik kompanııalar men basqa da salalyq bıznes birlestikteri, 50-den asa iri jáne shaǵyn bıznes ókilderi táýelsiz sarapshylar qatysty. Kezdesýde QQS boıynsha tirkeý shegin 15 mln teńgege deıin tómendetý jáne arnaıy B2C rejimdegi qyzmet túrleriniń aıasyn taryltý kásipkerlerdiń kótergen negizgi máseleleri boldy. Salyq tóleýshilerdi tirkeý úshin reforma sheńberinde belgilengen shek shaǵyn bıznestiń odan ári jumys isteýine kedergi bolýy múmkin jáne kásipkerler salyq salýdy boldyrmaý úshin óz kásiporyndaryn bólshekteýge nemese óz qyzmetiniń bir bóligin jasyrýǵa májbúr bolady.
«Jyl saıyn memleket QQS boıynsha esepke qoıýdyń joǵary shegine baılanysty bıznesti bólshekteýden shamamen 800 mlrd teńge tabys salyǵyn joǵaltady. Is júzinde bizde orta bıznes bar, biraq zań júzinde joq. Bul tetikterdi engizý – QQS boıynsha esepke qoıý shegin tómendetý ári jeńildetilgen arnaıy rejim tek B2C – bul kásipkerlikke qarsy kúres emes, kóleńkeli ekonomıkaǵa qarsy kúres. Salyq tóleıtin adam tólemeıtindermen adal básekelese almaıdy. Al ádil salyq salýǵa umtylýda bıznesti jappaı qoldaýsyz memlekettik organdar kóleńkeli ekonomıkamen tolyqqandy kúrese almaıdy», dep atap ótti A.Ámirın.
Eńbekaqy tóleý qoryna júktemeni azaıtý boıynsha saýaldarǵa da jaýap berildi. Kásipkerlerdiń áleýmettik salyqty jáne mindetti zeınetaqy jarnalaryn tóleýdi joıý bóliginde buryn usynylǵan reforma QQS mólsherlemesi 20%-ǵa deıin kóterilgen jaǵdaıda júrgizilýi múmkin ekene atap ótildi. Onda memleket jumys berýshiniń ornyna áleýmettik aýdarymdardy jabýǵa kiris alady. Biraq qazirgi ýaqytta usynylyp otyrǵan 16% QQS mólsherlemesimen áleýmettik aýdarymdardy ózgerissiz qaldyrý usynylady.
Kezdesýde sport klýbtary, aqparattyq qaýipsizdik, medısına, jeńil ónerkásip, týrızm jáne basqa da salalar boıynsha bıznes ókilderi sóz sóıledi. Kezdesý qorytyndysy boıynsha S.Jumanǵarın qatysýshylarǵa syndarly dıalog úshin alǵys bildirip, barlyq usynys salyq reformasy jobasyn Májilistiń qaraýyna shyǵarar aldynda Úkimettegi jumys toptarynda qaralatynyn atap ótti.
ALMATY