Qaıta jandanǵan dástúr

Keshe Ortalyq kommýnıkasııalar qyzmetinde ótken dástúrli brıfıngke qatysqan Parlament Májilisiniń depýtattary 5 ınstıtýttyq reformany júzege asyrý tóńireginde áńgime órbitti. Brıfıngte alǵashqy bolyp jýrnalıs­termen oı bólisken Parlament Májilisiniń depýtaty Murat Ahmadıev: «Memleket basshysy óziniń «Qazaqstan-2050» halyqqa Joldaýynda Qazaqstanda mádenı saıasattyń tujyrymdamasyn jasaýdy jáne bekitýdi tapsyrǵan bolatyn. Mádenı saıasatty júzege asyrý máselesinde keńes berýshi organ retinde, basqarý jáne mádenı klasterdi qurý jumysyn úılestirý úshin Prezıdent janynan ádebıet jáne mádenıet keńesi qurylýy yqtımal», – degen depýtat ári qaraı barlyq qazaqstandyqtardy biriktiretin, eldiń mádenıetin damytýǵa úlesin qosatyn ınstıtýt dep Qazaqstan halqy Asambleıasyn erekshe atap ótti. Birtekti mádenıet qalyptastyrýda Qazaqstan halqy Assambleıasy óziniń «Bir el – bir otbasy» atty aýqymdy sharasy aıasynda úlken jumystar atqaryp júrgenin aıtqan ol qazirgi kúni onyń aıasynda elimizdiń qazirgi zamanǵy mádenıeti men tarıhy týraly fılmder, hıkaıalar, arnaıy baǵdarlamalar túsiriletinine de toqtaldy. Al depýtat Orazkúl Asanǵazy: «Elbasy Nursultan Nazarbaev óz sózinde «Bizdiń qoǵamymyz neǵurlym qýatty jáne birtutas bola otyryp, tarıhı turǵydan qaraǵanda, kóptegen tilderden, mádenıetterden qalyptas­ty. Búginde bizdi «Máńgilik El» qundylyqtary biriktiredi. El qundylyqtary bizdiń baı-qýatty bolashaǵymyzǵa baǵdar bolady» dep atap ótken. Qazirgi «100 naqty qadamda» da, 5 ınstıtýttyq reformada da kóterilip otyrǵan másele – bizdiń birtekti mádenıe­timiz. Elbasynyń táýelsizdik alǵannan bergi armany – eldiń birligi. Osy birlik júıeli memlekettik saıasattan jáne ortaq mádenıetten turady. Iаǵnı, saıasatymyz­dyń sarabdal bolýy, táýelsizdik alǵannan beri áleýmettik-saıası jaǵdaıda jetken jetis­­tigimizdiń durys ekenine kózimizdi jetkizdi. Qazaq­tyń baıyrǵy, baıandy, ǵasyrdan ǵasyrǵa úzilmeı kele jatqan mádenıeti búkil qazaq­standyqtardy biriktire alatyn mádenıet ekendigin dáleldedi», – degen ol qazaqstan­dyqtardyń birtektiligi týrasynda sóz qozǵaǵanda, onyń irgetasyn qalaıtyn ulttyq qundylyqtardyń mańyzyna den qoıdy. «Birtektilikke keletin bolsaq, Naýryz meıramy – naǵyz birliktiń merekesi, arazdasqandy dostastyratyn, barlyq ókpeni umyttyratyn mereke. Jalpy, syrǵa salýdan bastap, qyz uzatý, úılený toıy sııaqty qazaqtyń kez kelgen dástúri jańa zamanǵa laıyqtalyp, burynǵyny jańarta otyryp, óte keremet mádenıetke aınaldy. Keıbir ata-ananyń balasynyń tusaýyn kestirmeýi múmkin shyǵar, al biraq kez kelgen kásipte mekemelerdiń tusaýlaryn kestirý dástúrge aınaldy. Aıtys óneriniń ózi burynǵy tarıhymyzdy tiriltti jáne naǵyz demokratııaǵa aınaldy. Qoǵamnyń, halyqtyń bılikke aıtatyn sózin bizdiń aıtys óneri jetkizip otyr. Osynyń barlyǵy, qazaqtyń mádenıeti búkil qazaqstandyqtardy biriktire alatynyn kórsetedi. Sondyqtan, birtektilik degende, birtekti mádenıet degende, biz qaıda birigemiz desek, ulttyq qundylyqtarymyzdyń, qazaq mádenıetiniń aınalasyna birigýimiz kerek», degen depýtat Elbasynyń qoldaýymen jaryq kórgen qazaqtyń «1000 áni», «Babalar sóziniń» 100 tomdyq jınaǵy mádenıetimizdiń deńgeıin kórsetetinin atap aıtty. Munan soń depýtattar jýrnalıster tarapynan qoıylǵan saýaldarǵa jaýap berdi. Anar TО́LEÝHANQYZY, «Egemen Qazaqstan».