Lańkestikke qarsy kúres jónindegi qalalyq komıssııanyń otyrysynda Almatynyń ákimi Ahmetjan Esimov dinı ekstremızm men lańkestiktiń aldyn alý oraıyndaǵy aqparattyq-nasıhattyq toptar jumysyn jandandyrýdy tapsyrdy.
Quqyq qorǵaý qurylymdarynyń, kúsh vedomstvolarynyń ókilderi jáne qalalyq basqarmalar basshylary qatysqan jıyn barysynda adamdar kóp jınalatyn jerlerdegi dinı arandatý men terrorızmge qatysty birqatar kókeıkesti máseleler talqylandy. Qala basshysy terrorızmge qarsy kúreske jumylǵan memlekettik organdardyń qarjylyq jáne materıaldyq-tehnıkalyq turǵydan qamtamasyz etilýi tıisti dárejede ekendigin atap kórsetti. Bul maqsattarǵa qalalyq bıýdjetten 2014-2015 jyldary 104 mıllıon teńgeden astam qarjy bólingen.
Sonymen qatar, qarapaıym halyqtyń dinı saýattylyǵyn arttyrý, teris dinı aǵymdar qyzmetiniń bet-perdesin ashý jóninde sharalar qoldanylýda. Dástúrli dinderdi nasıhattaý, qala turǵyndarynyń halqymyzdyń dástúri men mádenı murasyna saı keletin dinı sanasyn qalyptastyrý oraıyndaǵy qyzmet kúsheıtile túsken. Alaıda, bul jumysta kemshilikter men áttegen-aılar da joq emes. Sonyń saldarynan, ásirese, jastardy radıkaldyq baǵyttaǵy dinı ıdeologııa yqpalynan tolyqtaı qorǵaý múmkin bolmaı qalatyn kezder de az emes.
Osyǵan baılanysty alqaly jıynda sheshimin talap etetin birqatar mindetter belgilendi. Atap aıtqanda, qalalyq qurylymdardyń basshylaryna óz kásibimen aınalysyp júrgen jáne jumyssyz jastar arasyndaǵy nasıhatty pármendirek júrgizý, oqýshylardy qosymsha bilimmen neǵurlym keńirek qamtý, olardy dene shynyqtyrý men sport sharalaryna pármendi tartý tapsyryldy. Sondaı-aq, Jedel baqylaý ortalyǵynyń tehnıkalyq múmkindikterin keńeıtý jáne qalanyń elektrondy kartasyn jańǵyrtý oraıynda da jaqsartýdy tileıtin jaılar barshylyq.
Bir aıta keterligi, Almatyda osy baǵytta 9 aqparattyq- nasıhattyq top jumys isteıdi. Olar halyqtyń dinı saýattylyǵyn arttyrý, teris baǵyttaǵy dinı aǵymdar qyzmetiniń qıturqysyn ashý jóninde maqsatty túsindirý jumystaryn tynymsyz júrgizýde.
Qorǵanbek AMANJOL,
«Egemen Qazaqstan».
ALMATY.