jańa Sý-30 SM joǵary manevrli joıǵysh ushaqtarymen tolyqty
Qazaqstan Qarýly Kúshterdi Áýe qorǵanysy kúshteriniń (ÁQK) bas qolbasshysy, avıasııa general-maıory Nurlan Ormanbetov josparly jumys saparymen Irkýtsk qalasyna bardy.
Sapary barysynda N.Ormanbetov Irkýtsk avıasııa zaýytynda boldy. Zaýytta ol Irkýtsk avıaqurylysshylarynyń túrli úlgidegi ushaqtarynyń óndirisimen tanysyp, birqatar paıdaly kezdesýler ótkizdi. UQShU jáne ÁShQQ BRS sheńberinde Qazaqstan Respýblıkasy men Reseı Federasııasy arasyndaǵy áskerı-tehnıkalyq yntymaqtastyq taqyryby talqylandy.
Irkýtsk avıasııalyq kásipornyna jańa avıasııalyq tehnıkany teorııa júzinde meńgerý maqsatynda QR QK ÁÁK avıasııa bólimderiniń ushqyshtary men ınjenerlik-tehnıkalyq quramy keldi. Olar bir aı boıy reseılik áriptesterden jańa tehnıkanyń qyr-syryn úırenetin bolady.
«Sý-30 SM ushaǵy – biregeı, joǵary manevrli joıǵysh ushaq. Onyń qozǵaltqyshynda basqarylatyn tartý vektory bar. Avıasııa mamandary Qazaqstan Áskerı-áýe kúshteriniń ushqyshtary men ınjenerlik-tehnıkalyq quramyn qysqa merzim ishinde daıarlyqtan ótkizedi», – dedi Irkýtsk avıasııa zaýytynyń bas dırektory Alekseı Veprev.
«Elimizdiń Prezıdenti – Qarýly Kúshterimizdiń Joǵarǵy Bas qolbasshysy Nursultan Nazarbaevtyń saıasatynyń arqasynda búgingi tańda jaýyngerlik avıasııany qarý-jaraq pen áskerı tehnıkanyń zamanaýı túrlerimen qaıta jaraqtandyrý múmkindigi bar. Atalǵan kóp fýnksııaly ushaq Áýe qorǵanysy kúshteriniń jaýyngerlik múmkindigin aıtarlyqtaı arttyratyny anyq. Sonymen qatar, ushaqtyń tehnıkalyq erekshelikteri ushqyshtardyń jaýyngerlik daıarlyǵynyń joǵary deńgeıin qamtamasyz etedi», – dedi N. Ormanbetov.
Esterińizge sala ketsek, jaqyn arada elimizdiń Áskerı-áýe kúshteriniń qatary 4++ býynyna jatatyn jańa joǵary manevrli Sý-30 SM joıǵysh ushaqtarymen tolyqty. Bul – Qazaqstannyń áýe shekarasy kúzetiniń senimdiligin arttyra túsedi. Qazaqstan armııasy jyldan jylǵa nyǵaıyp, áskerlerge qarý-jaraq pen áskerı tehnıkanyń jańa úlgileri kelip túsýde, áskerı kadrlardyń kásibı biliktiligi artyp keledi.
«Egemen aqparat».