Sát saıyn myń túrli boıaýymen qyryq qubylyp turatyn ekrandaǵy jarnamalar Almatynyń bir bólshegine aınalyp ketkenin ańǵarý qıyn emes. Jarnama ındýstrııasynyń ámirshisine aınalǵan jaryqdıodty ekrandar statıkalyq sýretten barlyq parametr boıynsha aıla asyrady: Áý basta «led ekran» dep atalatyn tosyndaý ataýyna da qazir qulaǵymyz úırenip ketti. Keıipkerimiz Qaırat Jastarbekuly Almatydaǵy led-ekran ındýstrııasynyń 40 paıyzyn ıgerip otyr. Almaty naryǵymen shektelmeı, Qyrǵyzstan astanasy Bishkekten de «Aray-LED» kompanııasynyń fılıalyn ashqan.
Qazir Astana men Shymkent qalalarynda bólimshelerin ashýǵa qyzý daıyndyq júrgizip jatyr.
«Almatynyń ortalyq kóshelerine ár berip turǵan led-ekrandardyń monıtory men mıkro-shemasy ǵana Qytaıdan jetkiziledi. Basqa baılanys jelilerimen ıntegrasııalaıtyn qural-jabdyqtar, dybys-qozǵaltqysh qondyrǵylary kompanııaǵa qarasty sehta daıyndalady. Kez kelgen stasıonarlyq kompıýterdiń, ekrannyń negizi sanalatyn jabdyqty ózimizdiń mamandar jasap shyǵardy. Tehnıkanyń bul túriniń múmkindikteri óte kúshti. Mıkrochıpti syrtqy baılanystarmen ıntegrasııalaıdy, jaryqdıodty taratatyn tetikterdiń qyzmetin ártaraptandyrady», deıdi kásipker.
Qaırat – Altaı aımaǵynyń týmasy: Atamekenge kelip tý tigý týraly nıeti mektepte júrgende-aq oıanypty.
«2000 jyldardyń ortasynda demalys alyp, shekaranyń arǵy betinde qalyp qoıǵan ata-anama bardym. Az ýaqyt ishinde Qytaı eliniń barlyq sala boıynsha damyp ketkenin kózben kórdim. Almatydaǵy led-ekrandardyń basym kópshiligi ózge kompanııalardyń ıeliginde bolatyn. Ata-anam, baýyrlarymnyń qarjylyq demeýimen elge led-ekrandy, oǵan qajetti tehnologııany alyp kelip, bizge múldem tanys emes, biraq keleshegi zor bıznes túrin bastap kettim», deıdi Q.Jastarbekuly.
Onyń aıtýynsha, naryqta ózderin qojaıyn retinde sezine bastaǵan iri kompanııalardyń qas-qabaǵyna qaramaı ekpindep kirýlerine jastyqqa tán maksımalızm áser etse kerek.
«Qazir bankter men úlken kompanııalardan tapsyrys alamyz. Almatynyń ál-Farabı dańǵyly boıynda ornalasqan, kólemi 650 sharshy metr bolatyn, qala arhıtektýrasynyń eń jarqyn obrazynyń biri retinde tanylǵan LED-ekran – bizdiń jobamyz. Bul joba elimizdegi eń iri ekrandardyń biri retinde tanylǵan. Sondaı-aq «Almaty» saýda oıyn-saýyq ortalyǵyndaǵy shamshyraq beınesindegi led-stella da bizdiń ónimimiz», deıdi.
Onyń sózinshe, «Aray-LED» ónimderin otandyq bıznesmender LED ındýstrııasynyń jergilikti brendi dep tanıdy.
«Tehnologııa damyp jatyr. Zertteýler kórsetkendeı, beıne jáne anımasııa formatynda usynylǵan aqparat statıkalyq mátinge nemese sýretke qaraǵanda 30% jaqsy este saqtalady. Soǵan saı bıznestiń mıy, aǵzasy kúndiz-túni saǵat tilindeı sartyldap jumys istep turýy kerek. Keıde bolashaq jobalarymnyń nusqasyn túsimde kóretin kezderim bolady. Shoý-bıznes pen ekonomıkalyq bıznes arasynda bir-birine uqsaıtyn tásilder kóp. Mysaly, shoý-bıznes ókilderi hıt bolǵan ónimderi naryqty jalyqtyryp alǵanyn sezse, ornyna jańa ónim usyna qoıady. Bizde de solaı. Naryqty jalyqtyryp alýǵa, ıdeıamyzdyń kósh sońynda qalyp ketýine jol berýge bolmaıdy. Usynǵan ónimderimiz, rolıkterimiz trendten túse bastasa, jańa jobany usynýǵa týra keledi. Ázirge senim bildirgen kompanııalardy jalyqtyryp alǵan kezimiz joq», deıdi Q.Jastarbekuly.
Kompanııanyń bir jyldaǵy qarjy aınalymy – 2 mlrd dollar. Qyzmetkerleriniń jalaqysy 500 myń teńgeden bastalady.
«Qyzmetker qabiletin ádil baǵalaýǵa tyrysamyz. Kólik, úı alǵysy kelse, kompanııanyń qarjylyq aınalymy esebinen paıyzsyz qarjy bólemiz. Áleýmettik, medısınalyq saqtandyrý máselesi kompanııa esebinen sheshilgen», deıdi.
Onyń sózinshe, LED ekrandy ózimizde jasaý ońaı. Al mıkroshema óndirisi boıynsha Taıvan eshbir eldi alǵa ozdyrǵan emes.
«Taıvan tek iri eksporttaýshylarmen jumys istegendikten, ázirge olar biz úshin jabyq naryq. Eger Ortalyq Azııa elderi naryǵyna jol salsaq, Taıvanmen kelissóz jasaýǵa bolady», deıdi Q.Jastarbekuly.
ALMATY