2025 jylǵy 1 aqpandaǵy jaǵdaı boıynsha jergilikti atqarýshy organdardyń ruqsatymen Qazaqstan aýmaǵynda 13 072 shetel azamaty eńbek etedi, dep habarlaıdy Egemen.kz Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap.
«Shetel jumys kúshin (budan ári – ShJK) tartýǵa ruqsattardyń arasynda mynadaı sanattar bar: basshylar men olardyń orynbasarlary úshin 568 (birinshi sanat), qurylymdyq bólimshelerdiń basshylary úshin 2 528 (ekinshi sanat). Tartylǵan ShJK negizgi bóligi úshinshi (mamandar) jáne tórtinshi (bilikti jumysshylar) sanattarǵa jatady – tıisinshe olar 4 787 jáne 987 adam. Sondaı-aq maýsymdyq jumystarǵa 672 adam, al korporatıvtik aýystyrý aıasynda 3 530 adam tartyldy», delingen habarlamada.
Qazirgi tańda elimizde shetel jumys kúshin paıdalanatyn 1 710 jumys berýshi bar. Olarda 383,1 myńnan astam Qazaqstan azamaty jumys isteıdi, bul qyzmetkerlerdiń jalpy sanynyń 96,6% - y.
«Ekonomıkalyq qyzmet túrleri boıynsha eń kóp jumys isteıtinder qurylys salasynda – 5 343 adam, taý – ken ónerkásibi jáne karerlerdi qazý – 1 360 adam, óńdeý ónerkásibi – 1 338 adam, ákimshilik jáne kómekshi qyzmetter – 1 089, aýyl, orman jáne balyq sharýashylyǵy – 688 adam. Eńbek mıgranttary keletin negizgi elder: Qytaı – 4 778 adam, Túrkııa – 1 158 adam, Úndistan – 1 121 adam, О́zbekstan – 623 adam», dep habarlady mınıstrliktiń baspasóz qyzmeti.
Esterińizge sala keteıik ishki eńbek naryǵyn qorǵaý maqsatynda QR Eńbek jáne halyqty áleýmettik qorǵaý mınıstrligi jyl saıyn respýblıkaǵa shetel mamandaryn tartýǵa kvota belgileıdi jáne bóledi. 2025 jyly jalpy kvota respýblıkadaǵy jumys kúshiniń sanyna qatysty 0,2% nemese 14,8 myń birlik mólsherinde belgilengen.