ASTANA. 7 aqpan. Elordalyq «Barys» syrt aıdynda Nıjnıı Novgorodtyń «Torpedosyna» 2:1 esebimen ese jiberdi. Bul týraly egemen.kz habarlady.
Oıynǵa «Barystyń» shabýylshysy Nıkolaı Antropov qatysqan joq. Sondaı-aq, astanalyqtardyń bas jattyqtyrýshysy Andreı Nazarov qaqpashy Iаn Lasony birinshi mınýttan bastap aıdynǵa shyǵardy.
Qurlyqtyq hokkeı lıgasy aıasynda ótken oıyn aıdyn ıeleriniń basymdyǵymen bastaldy. Tipti, nebári 2-mınýtta «Barys» tórt oıynshymen qaldy. Sebebi, qolyndaǵy oıyn taıaǵyn tym bıik kótergeni úshin Konstantın Rýdenko eki mınýttyq aıyp ýaqytymen jazalandy. Qýanyshymyzǵa oraı, bul múmkindikten «Torpedo» hokkeıshileri nátıje shyǵara almady. Tartystyń 6-mınýtynda aıdyn ıeleriniń kezekti soqqysy qaqpa mańdaıshasynan keıin serpildi. Tek kezeńniń orta tusyna aýǵan kezde qonaqtar óz oıyn órnegin tapty. Úziliske deıin «Barys» eki márte oıynshy basymdyǵyna ıe bolǵanymen, esep ashylmady.
Kelesi kezeń de alǵashqysyndaı teń jaǵdaıda órbidi. Degenmen, bul joly jankúıerler soǵylǵan shaıbanyń kýási boldy. Oıynnyń 25-mınýtynda «Barys» sapyndaǵy Oskars Bartýlıs alystan qaqpaǵa soqqy baǵyttap kórdi. «Torpedo» qaqpashysy Ivan Kasýtınniń dál aldyna kele jatyrǵan shaıbanyń baǵytyn ózgertip úlgergen Konstantın Pýshkarev nátıjeli soqqynyń avtory atandy. Ekinshi úziliske deıin aıdyn ıeleri eki ret oıynshy basymdyǵyn paıdalana almady. О́z kezeginde «Barys» oıynshylary bir márte sondaı basymdyqqa ıe bolǵanymen, esep ózgerissiz qaldy.
Sheshýshi kezeń «Torpedonyń» shabýylymen bastaldy. Matchtyń 43-mınýtynda «Barys» sapynan Kevın Dallmen eki mınýtqa aıdynnan qýyldy. Desek te, ol bar bolǵany 13 sekýndtan keıin oıynǵa qaıta qosyldy. Sebebi, Peterıs Skýdra jattyqtyratyn qarsylastarymyzǵa basymdyqty júzege asyrý úshin osynsha ýaqyt jetkilikti boldy.
Tarazy basy teńeskennen keıin qos komandanyń qarqyny kúsheıip, oıynnyń jyldamdyǵy artty. Alaıda, bul tartysta «Torpedonyń» baǵy basym bolyp, mańyzdy úsh upaıǵa qol jetkizdi. Jeńis shaıbasyn kezdesýdiń 54-mınýtynda Sakarı Salmınen esimdi hokkeıshi soqty.
«Barys» jeńilgenine qaramastan Shyǵys konferensııasyndaǵy 6-ornyn saqtap qaldy. Al «Torpedo» Batys konferensııasynda bir saty joǵary órlep, 8-orynǵa jaıǵasty. Astanalyq komanda kelesi oıyndy 11 aqpan kúni syrt aıdynda Novokýzneskiniń «Metallýrgine» qarsy ótkizedi.
Elaman Qońyr.
Derek: egemen.kz.
Sýret: khl.ru.