ASTANA. 7 aqpan. Tennısten Federasııa kýbogy úshin jarys aıasynda Qazaqstan Japonııadan 2:0 esebimen jeńildi. Bul týraly egemen.kz habarlady.
Otandyq tennısshiler atalǵan jarysta Azııa jáne Muhıt aımaǵy elderiniń birinshi tobynda oınaǵany belgili. «V» tobyna túsken qyzdarymyz osyǵan deıingi barlyq oıyndarynda jeńiske jetip, II Álemdik topqa beriler joldamaǵa talasýǵa múmkindik alǵan edi. Ol úshin Japonııany jeńse bolǵany. Degenmen, dál japon tennısshilerimen bolǵan sheshýshi tartysta ulttyq quramanyń kapıtany Dıas Dosqaraev komanda quramyna ózgeris engizdi. Soǵan sáıkes, Japonııaǵa qarsy jekeleı synda elimizdiń birinshi, álemniń 33-raketkasy Zarına Dıas shyqqan joq. Kapıtan ony juptyq kezdesýdegi oıynǵa saqtaýdy jón kóripti.
Nátıjesinde, jekeleı synda Iаroslava Shvedova men WTA reıtınginde 111-satyda turǵan, tájirıbesi az Iýlııa Pýtınsevaǵa senim artyldy. Osy jarys barysynda jekeleı synǵa alǵash ret shyǵyp turǵan Iýlııa qarsylasy Mısakı Doıǵa 6:1, 6:3 esebimen ese jiberdi. Sondaı-aq, Japonııanyń kóshbasshysy Kýrýmı Naramen básekege túsken Shvedova da alǵashqy setti 6:2 esebimen jeńgenimen, qalǵan eki kezeńde 6:7, 3:6 esebimen jol berdi. Osylaısha eki oıynda qajet upaılaryn oljalaǵan Japonııa tennısshileri merziminen buryn jeńiske jetti. Kezdesý taǵdyry sheshilgendikten qos komanda arasyndaǵy josparlanǵan juptyq oıyn bolǵan joq. Bul tartysta joǵaryda aıtqanymyzdaı, Zarına Dıas pen Slava Shvedova shyǵýy tıis bolatyn.
Endi erejege sáıkes jarysty ári qaraı Japonııa jalǵastyrady. Olar II Álemdik toptyń eń osal komandasymen sheberli baıqasady. Jeńgeni atalǵan toptyń joldamasyna ıe bolady.
Federasııa kýbogy jarysynyń Azııa jáne Muhıt aımaǵy elderi arasyndaǵy básekesinde Qazaqstan osymen Japonııadan úshinshi ret jeńilip otyr. Alǵash ret 2000 jyly kezdesip, bizdiń qyzdar 3:0 esebimen jeńilgen edi. Ol kezde jarystyń Japonııada ótkenin aıta keteıik. Kelesi tartys 2011 jyly Taıland jerinde ótti. Bul joly otandyq tennısshiler bir oıynda jeńiske jetkenimen, jalpy esepte 2:1 esebimen qarsylastaryna ese jiberdi.
Elaman Qońyr.
Derek: egemen.kz.
Sýret: facebook.com.