Asyq oınaý, asyq atý kishkentaılardy eptilikke jáne mergendik pen dáldikke tárbıeleı alatyn ulttyq oıyndardyń biri. Ony buǵan deıin negizinen óz ultymyzdyń perzentteri ózderine serik etkeni belgili. Al elimizdegi ózge etnos ókilderiniń balalary asyq oınaı ma? Bul saýalǵa kim-kimde bolmasyn qapelimde jaýap bere almaı oılanyp qalatyny anyq.
Buǵan kóp tosylýdyń qajeti joq bolyp shyqty. Oral qalalyq bilim bólimine qarasty mektepten tys jumys ortalyǵyndaǵy «Tilashar» úıirmesi osy asyqtyń eki birdeı paıdasyn orys mektepterinde oqıtyn ózge otandastarymyzdyń balalarynyń boıyna darytyp júrgeni joǵaryda qoıylǵan saýaldyń jaýaby ispettes.
Máseleniń mánisi mynada. Tilashar úıirmesine qatysýshylar úshin asyq oınaý qazaq tilin emin-erkin úırenýdiń basty bir joly bolyp otyr. Sóıtip, ózge ult ókilderiniń jetkinshekteri úıirme jumysyna qatysa júrip turmystyq tildi táp-táýir meńgerip alypty. Tipti, olar munda úırengen sózderiniń mán-maǵynasyn úılerine barǵannan keıin ata-analaryna da aıtady. Taǵy bir súısinerligi olar balalarynyń aıtqandaryn jerge qaldyrmaı ulttyq boıaýǵa toly qazaqsha sózderdiń túp-tórkinin balalarynyń aıtqandary arqyly uǵynyp alýǵa tyrysady eken.
Tilashar úıirmesiniń jetekshisi Nurgúl Muratovanyń til syndyrý sabaqtaryn halqymyzdyń ulttyq salt-dástúrleri men ulttyq oıyn túrleri negizinde ótkizýi oǵan qatysýshylardyń úlken qyzyǵýshylyǵyn týǵyza bilipti. Tek osyndaı jaǵdaıda ǵana sabaqtar áserli ári nátıjeli bolatynyna kóz jetkizip júrmiz. Úıirme músheleri kóbine ulttyq «Han talapaı» asyq atý oıyny túrinde ótkiziletin sabaqtarda jańa sózderdi tez ári shapshań meńgerip alady. Úıirmege keletin ózge etnos ókilderi balalarynyń memlekettik tildi úırenýge degen qushtarlyqtary joǵary. Olardyń qaı-qaısysy da Qazaqstanda turǵan soń qazaq memleketiniń tilin bilýge tıistimiz degen ózderiniń júrekjardy tilekterin maǵan da aıtyp jatady, – deıdi ol.
Temir QUSAIYN,
«Egemen Qazaqstan».
ORAL.