Qytaıda turatyn Berik degen baýyrymyzdyń osydan 1 apta buryn 8 kılo altyn taýyp alǵany týraly elimizdiń buqaralyq aqparat quraldary jarysa jazǵan. Endi osy sáttiliktiń arqasynda qandasymyz qomaqty qarjyǵa ıe boldy.
Altaı aımaǵy Shińgil aýdanynda turatyn qazaq jigiti tapqan altyn qyrýar aqshaǵa satylǵan. Qytaı zańy boıynsha kesek kólemdegi altyn men baǵaly zattar úkimetke tıesili bolýy kerek degen tarmaq bar. Soǵan qaramastan, ınternet jelisi arqyly júrgizilgen saýalnamaǵa qatysqan 60 myń qandasymyzdyń 97 paıyzy at basyndaı altyn Beriktiń enshisine berilýi kerek degen sheshimdi qoldaǵan. Nátıjesinde halyqtyń uıǵarymy durys dep tanylyp, 8 kıloǵa jýyq baǵaly zat 5 mln. Qytaı ıýanyna (830 myń AQSh dollary) puldanyp, osynsha qarjy álgi qazaq azamatyna berilgen.
Qandasymyzdyń sózine qaraǵanda, altyndy jer betinde jyltyrap jatqan jerinen taýyp alǵan. Onyń dıametri 23 sm., eni 18 sm., eń qalyń jeri 8 sm. bolǵan. «Tabıǵattyń sheber qoly beder salyp, órnektegen saf altynnyń beti kún sáýlesimen alaýlanyp, kózdiń jaýyn alatyndaı jarqyraıdy», – depti kórgender.
Mamandardyń aıtýynsha, álemde mundaı kesek altyndar jıi ushyrasa bermeıtin kórinedi. Tipti, ken oryndarynyń ózinde de tym sırek kezdesedi eken.
Joldybaı BAZAR,
«Egemen Qazaqstan».