Dınara Qulybaevaǵa qatysy bar Qazaqstan-Brıtan tehnıkalyq ýnıversıteti (QBTÝ) memleket menshigine qaıtaryldy, dep habarlaıdy Egemen.kz.
Qarjylyq eseptilik depozıtarııindegi aqparatqa sáıkes, endi ýnıversıtettiń jańa ıesi - Qaıtarylǵan aktıvterdi basqarý kompanııasy. Bul kompanııanyń jalǵyz quryltaıshysy jáne qatysýshysy – Qazaqstan Úkimeti. Ýnıversıtettiń aksıonerlik quramyndaǵy ózgerister 27 aqpanda resmı tirkelgen.
QBTÝ 2001 jyly 3 tamyzda Qazaqstan Úkimetiniń qaýlysymen qurylǵan. Qazaqstan tarapynan quryltaıshysy – Úkimet, al ýákiletti organy – Bilim jáne ǵylym mınıstrligi. Brıtan taraptan ýnıversıtettiń seriktesteri Ulybrıtanııa elshiligi men onyń negizgi ókili Brıtandyq keńes boldy.
2003 jyly ýnıversıtet «QazMunaıGaz» ulttyq kompanııasynyń menshigine ótti, sol kezde kompanııa ýnıversıtettiń jalǵyz aksıoneri bolǵan. 2018 jyly jekeshelendirý baǵdarlamasy aıasynda QBTÝ Nursultan Nazarbaevtyń bilim berý qory qaramaǵyna ótti. Qordyń quryltaıshylarynyń biri – Nazarbaevtyń ortanshy qyzy Dınara Qulybaeva.
2023 jyly shilde aıynda Qazaqstan Prezıdenti Qasym-Jomart Toqaev zańsyz alynǵan aktıvterdi memleketke qaıtarý týraly zańǵa qol qoıdy. Ol kezde bul mehanızm iri korrýpsııaǵa ushyraǵan tulǵalar men ákimshilik-bılik resýrstary bar olıgopolııa toptaryna qoldanylatyny aıtylǵan edi.