Ortalyq kommýnıkasııalar qyzmeti alańynda ótken «Joǵary sot Keńesi janyndaǵy Sot jıýrıiniń jumysyndaǵy jańa tásilder týraly» atty baspasóz máslıhatynda sýdıalardyń zań buzyp, óreskel qatelikter jiberý faktilerin tekserýdiń jańa tetigi qoldanysqa engizilgeni habarlandy.
Joǵary sot Keńesi janyndaǵy Sot jıýrıi barlyq sot satysyndaǵy sýdıalarǵa qatysty tártiptik ister men materıaldardy qarap, tekserýge ýákilettigi bar organ sanalady. Sot jıýrıiniń tóraǵasy Nurjan Qaıypjan byltyr sýdıalardyń tártiptik jaýapkershiligin kúsheıtý maqsatynda zańnamaǵa túzetýler jasalyp, 2024 jyldyń 1 qazanynan bastap sýdıalar tarapynan zańdy óreskel buzýdyń barlyq faktisin tekserýdiń jańa júıesi qoldanysqa engizilgenin málimdedi.
«Atalǵan ózgeriske baılanysty zańdy óreskel buzý faktisi anyqtalsa, joǵary turǵan sot satysy (apellıasııa nemese kassasııa) sýdıany tártiptik jaýapkershilikke tartýǵa usynys jasap, ol is mindetti túrde Sot jıýrıiniń qaraýyna jiberiledi», dedi spıker.
Buryn sýdıalar tarapynan jasalǵan zańsyzdyqtar Joǵarǵy sot tóraǵasynyń usynýy nemese joǵarǵy jáne oblystyq sottardyń jalpy otyrystarynyń sheshimderimen ǵana qazylar alqasyna jiberiletin. Bul úrdis tym kúrdeli bolǵandyqtan, óreskel zań buzýshylyq oryn alǵan isterdiń basym bóligi jaýapsyz qalatyn.
«Jańa júıe mundaı faktilerdiń bárin Sot jıýrıi qaraýǵa múmkindik týǵyzady. Bul is sot tóreligin iske asyrý sapasyn arttyryp, azamattardyń sýdıalarǵa degen senimin kúsheıteri anyq», dedi N.Qaıypjan.
Spıkerdiń aıtýynsha, qazir Sot jıýrıiniń quramynda Joǵarǵy sottyń 4, oblystyq sottardyń 5, aýdandyq deńgeıdegi 4 sýdıasy bar. Barlyq sot ınstansııasy ókilderiniń pikirin eskere otyryp jasaqtalǵan bul quram neǵurlym obektıvti, salmaqty sheshimder qabyldaıdy.
«Isi qaralǵan sýdıa Sot jıýrıiniń sheshimderimen kelispegen jaǵdaıda Joǵary sot Keńesine shaǵymdana alady. Bul Keńes sýdıanyń dálelderin muqııat zerdelep, Sot jıýrıiniń júrgizip jatqan tártiptik isin toqtatýǵa, materıaldardy qaıta qaraýǵa jiberýge, tipti sheshiminiń kúshin joıýǵa quqyly», dedi N.Qaıypjan.
Sonymen qatar Sot jıýrıine jiberilgen materıaldarmen isi qaralyp jatqan sýdıa tanysa alatyny, qajet bolǵan jaǵdaıda iske advokattar men zań konsýltanttaryn tartýǵa quqyly ekeni aıtyldy. Spıkerler sýdıalardyń táýelsizdigin nyǵaıtý jáne sýdıalarǵa qysym jasaý táýekelderin boldyrmaý máselelerine qatysty da oılaryn ortaǵa saldy.