Bıyl Abaı oblysyna erikti túrde qonys aýdarý baǵdarlamasy aıasynda 530 adam qonys aýdardy. Onyń 310-y – ishki qonys aýdarýshylar. Al 210 adam Qytaı, Mońǵolııa, О́zbekstan, Túrikmenstan, Reseı elderinen kóship keldi.
Búginde elimizdiń teriskeıi men kúngeıinde aýyl halqynyń azaıý úrdisi baıqalady. Osy bir olqylyqtyń ornyn toltyrý maqsatynda qazir eńbek kúshi, mamandardan tapshylyq kórip otyrǵan, mektepte bala sanynyń azaıýynan jabylýdyń az-aq aldynda turǵan mekenderge kelgen ár aǵaıynnyń qadiri artyq ekeni túsinikti. Memlekettiń de mejemdi oıy osyǵan saıady. «Qazaqtar qaı jerde ómir súrse de, olardyń jalǵyz Otany – Qazaqstan. Sondyqtan shetelde turatyn otandastarymyzdy qoldaý árqashan mańyzdy», degen edi Memleket basshysy.
Resmı derekke súıensek, bıyl Abaı oblysynda memlekettik qoldaý aıasynda 503 azamatqa kósh shyǵyndaryn óteýge bir rettik materıaldyq kómek kórsetilip, 152 otbasynyń turǵyn úı jaldaý, kommýnaldyq qyzmet shyǵyndary ótelgen. 112 otbasyna turǵyn úı satyp alýǵa ekonomıkalyq utqyrlyq sertıfıkattary berildi. Sertıfıkat qarajaty bir otbasyna turǵyn úı qunynyń 50%-y, ıaǵnı 1 160 AEK-ten aspaıtyn mólsherde belgilengen.
«Erikti túrde óńiraralyq qonys aýdarýshylarǵa qoldaý kórsetý aıasynda jergilikti bılikten memlekettik jeńildikter qarastyrylǵan. Atap aıtqanda, kóshýge bir rettik materıaldyq kómek, otaǵasyna, otbasynyń árbir múshesine 70 AEK beriledi. Ishki qonys aýdarýshylar men shetelden kelgen qazaqtar qajet bolǵan jaǵdaıda tehnıkalyq, kásiptik oqytýǵa, qysqamerzimdi kýrstarǵa jiberiledi», deıdi oblystyq jumyspen qamtý jáne áleýmettik baǵdarlamalardy úılestirý basqarmasynyń basshysy Aıman Nurlybek.
Sonymen qatar qalaǵa qonys aýdarǵandarǵa bir adamǵa 20 AEK, otbasy músheleriniń sany eki ne tórt adam bolsa – 25 AEK, otbasy músheleriniń sany bes, odan da kóp bolsa 30 AEK kómek kórsetiledi. Aýyldy jerge kóship barsa, bir adamǵa – 15 AEK, otbasy músheleriniń sany eki ne tórt adam bolsa – 18 AEK, otbasy músheleriniń sany bes, odan da kóp bolsa, 21 AEK tólenedi.
«Elimizde alys-jaqyn shetelderden kóship kelgen azamattar «Ata joly» kartasyn ala alady. Onymen el aýmaǵynda 10 jyl erkin turyp, jumys isteıdi, sondaı-aq turatyn aımaqty óziniń tańdaý múmkindigi bar. «Ata joly» kartasy bar shetel qazaǵy basqa eldiń azamaty bola otyryp, Qazaqstan azamattarymen teń quqyqqa ıe», deıdi Aıman Nurlybek.
«Ata joly» kartasynyń negizi maqsaty – ár qazaqtyń tarıhı otanymen baılanysyn nyǵaıtý, elge tabysty bıznesmenderdi tartý. Máselen, bıyl el kóleminde óz isin damytýǵa daıyn bıznes-ımmıgranttar 27 karta alsa, suranysqa ıe mamandar osyndaı 38 kartanyń ıegeri atandy.
«2025 jyly qonys aýdarýshylar men qandastardy qabyldaýdyń óńirlik kvotasymen baǵdarlama aıasynda Abaı oblysyna 499 adamdy (244 qandas, 255 qonys aýdarýshy) ornalastyrý josparlanyp otyr», deıdi óńirlik kóshi-qon salasynyń mamandary.
Demek bıyl Abaı elinde taǵy da 500 adamdy qabyldaýǵa memlekettik jeńildikter qarastyrylyp otyr degen sóz.