Ideıasyn tabandylyqpen iske asyryp, dáýleti áýletinen asyp, ekonomıkanyń ilgeri basýyna úles qosyp júrgen qyz-kelinshekter barshylyq. Qazir shaǵyn jáne orta bıznestiń 43%-y áıelderge tıesili, olardyń menshigindegi kásiporyndarda júz myńdaǵan adam jumys isteıdi.
Dástúrli «Women In Business» halyqaralyq forýmy ár salanyń kóshbasshysy atanǵan 350-den astam áıeldiń basyn qosty. «Halyk Bank» basqarma tóraǵasy Úmit Shaıahmetovanyń aıtýynsha, elimizde er adamdarǵa qaraǵanda áıelder 26%-ǵa az tabys tabady.
«Munyń bir sheshimi – áıelder kásipkerligin qoldaý. Bizdiń «Bıznestegi áıelder» baǵdarlamamyz arqyly 2018 jyldan bastap ár óńirden 600-den astam áıel 6-8%-dyq mólsherlememen 7 mlrd teńgege deıin nesıe aldy», deıdi.
Dúnıejúzilik banktiń Ortalyq Azııadaǵy óńirlik dırektory Tatıana Proskýrıakovanyń sózinshe, aımaqtaǵy áıelder quqyǵyn keńeıtýdegi jetistikterge qaramastan, kásipkerlikte áli de kedergi bar.
«Genderlik teńdik – ádildik máselesi ǵana emes, sonymen qatar óńir elderiniń ekonomıkalyq áleýeti. Eger áıelder ekonomıkaǵa erlermen teń dárejede aralassa, onda elimizde IJО́ 27%-ǵa, Tájikstanda 63%-ǵa deıin óser edi. Jaǵdaıdy ózgertý úshin bıznesti damytýda menshiktik, muragerlik jáne áıelderdiń qarjylyq qyzmet pen nesıe qarajatyna qol jetkizýdi jeńildetý máselelerinde zańnamalyq kepildikterdi qamtamasyz etý qajet», dedi.
«Techno Women» kommersııalyq emes uıymynyń basqarma tóraıymy Azıza Shójeevanyń pikirinshe, jasandy ıntellektiniń paıda bolýy, tehnologııalardyń damýy óz kezeginde paıdamen qatar táýekel de týdyrady.
«Qazir bárimiz jappaı sıfrlandyrý áleminde ómir súrip jatqandyqtan sıfrlyq tehnologııa men JI múmkindikteri kópti alańdatady. Bolashaǵymyzdyń qandaı bolary belgisiz. Biraq jasandy ıntellekt adamnyń bir qasıetin almastyra almaıdy. Bizdiń kúshti jaǵymyz – emosııa men empatııamyz. Al kásibin júrgizip jatqan qyz-kelinshekterdiń kúshtiligi – janashyrlyǵy men sezimtaldyǵynda», deıdi ol.
Forým uıymdastyrýshysy Aqerkin Eralıeva «Women in Business» – jaı ǵana forým emes, bul – bıznes fılosofııasy, aqparattyq daý-damaı men netvorktiń sapaly deńgeıiniń transformasııasy deıdi.
«Bıyl biz áıel kásipkerler jańa qaýip-qaterlerge qalaı qarsy turyp, makroekonomıkalyq ózgeristerden aqparattyq qaýipsizdikke deıingi jahandyq máselelerdi sheshýge qalaı yqpal ete alatynyn talqyladyq. Áıelder bıznesine jańa múmkindikter ashyp jatqan sıfrlyq transformasııa men jańa tehnologııalarǵa basa nazar aýdaryldy», dep qorytyndylady.
ALMATY