Prezıdent Italııa delegasııasyna iltıpat bildire otyryp, búgingi kezdesý ózara múddege saı keletin ekijaqty qatynastardyń mańyzdy aspektilerin talqylaý úshin ońtaıly múmkindik ekenin aıtty, dep habarlaıdy Egemen.kz aqparat agenttigi.
– Italııaǵa byltyrǵy saparymnan jaqsy áser aldym. Sizdiń qonaqjaılyq tanytyp, nátıjeli kelissóz júrgizýge barynsha jaǵdaı jasaǵanyńyzdyń arqasynda saparym óte sátti ótti. Eki memleket túrli salada tyǵyz qarym-qatynas ornatqan. Bizdiń naryqta biraz ıtalııalyq kompanııa jumys isteıdi. Olardyń qatary qarqyndy artyp keledi. Mádenı-gýmanıtarlyq baılanystarymyz da oıdaǵydaı damyp jatyr. Sondyqtan elderimizdiń arasynda berik yntymaqtastyq qalyptasqan dep sanaımyn, – dedi Qasym-Jomart Toqaev.
Italııa Prezıdenti qushaq jaıa qarsy alǵany úshin rızashylyǵyn bildirip, bul kezdesý eki el arasyndaǵy shynaıy dostyqtyń kórinisi ekenin aıtty. Sondaı-aq ol ekijaqty qatynastardyń qazirgi jaǵdaıyn joǵary baǵalap, ózara strategııalyq seriktestikti keńeıtýge mol múmkindik bar ekenin atap ótti.
– Biz shyn máninde barlyq baǵytta, sonyń ishinde saıası, ekonomıkalyq, saýda jáne mádenı salalarda tamasha baılanys ornattyq, – dedi Serdjo Mattarella.
Áńgimelesý barysynda prezıdentter saýda-ekonomıkalyq jáne ınvestısııalyq yntymaqtastyqty damytý perspektıvasyn egjeı-tegjeıli talqylady.
Memleket basshysynyń aıtýynsha, Italııa Qazaqstannyń basty saýda seriktesteriniń arasynda úshinshi oryn alady, sondaı-aq ekonomıkamyzǵa qarjy quıǵan bes iri ınvestordyń qataryna kiredi. О́tken jyldyń qorytyndysy boıynsha ózara saýda aınalymy 20 mıllıard dollarǵa jýyqtaǵan. Qazaqstanda kásibin júrgizetin 250-ge tarta ıtalııalyq kompanııa munaı-gaz, jańartylatyn energııa, mashına jasaý jáne aýyl sharýashylyǵy salalarynyń damýyna eleýli úles qosyp keledi.
Budan bólek, memleketter basshylary jahandyq kún tártibindegi ózekti máseleler jóninde pikir almasty.