Sý resýrstary jáne ırrıgasııa mınıstrligi sý tasqynyna daıyndyq sheńberinde 74 gıdrotehnıkalyq qurylysty jóndedi. Sondaı-aq, 239 shaqyrym ózen arnasy tazartyldy, dep habarlaıdy Egemen.kz.
16 óńirde jalpy uzyndyǵy 584 shaqyrym bolatyn 384 bóget jóndelip, qaıta turǵyzylǵan. Jergilikti ákimdiktermen birlesip, 6 oblystyń (Aqmola, Aqtóbe, Batys Qazaqstan, Pavlodar, Soltústik Qazaqstan, Qostanaı) 84 eldi mekeninde qorǵanys bógetteri men gıdrotehnıkalyq qurylystardy salý jáne jóndeý boıynsha 57 joba iske asyrylyp jatyr. Atalǵan jumystar 359 myń adamnyń qaýipsizdigin qamtamasyz etýge múmkindik beredi.
Mınıstrliktiń málimetinshe byltyr 14 oblysta 84 sý sharýashylyǵy nysanyna kóp faktorly zertteý júrgizildi. Bıyl 105 gıdroqurylysty kóp faktorly zertteýden ótkizý josparlanyp otyr.
«Elimizdiń barlyq sý qoımalary bekitilgen kestege saı jumys istep tur. Sý deńgeıine turaqty monıtorıng jáne táýlik boıy kezekshilik júrgiziledi. Bos oryndar daıyndaý úshin sý qoımalarynan sý jiberý jumysy jalǵasyp jatyr. Bul sý tasqyny kezinde sýdy qaýipsiz ótkizýge múmkindik beredi», dedi vıse-mınıstr Nurlan Aldamjarov.