Kúndelikti tutynatyn astyń sapaly ári qunarly bolýyn jiti nazarda ustap, otandyq naryqta 20 jyldan astam ýaqyt tabandylyqpen eńbek etip kele jatqan «Adal» kompanııasynyń sút ónimderi ár shańyraqtyń as úıinen tabylady.
Eńbekshiqazaq aýdanynyń Jańashar aýyldyq okrýginde ornalasqan «Adal» agroónerkásiptik aksıonerlik qoǵamynda 650 adam eńbek etedi. Kompanııa qurylymyna aýyl sharýashylyǵy, sút zaýyty, ferma, daıyn ónimdi taratý departamentteri kiredi.
Isin ilgeriletip otyrǵan agroónerkásip keshenine áli de bolsa agronom, mehanık, traktorshy, baqtashynyń bos jumys oryndary bar. Jaz aılarynda egis alqaptaryn sýaratyn sýshylardy tappaı qınalatyndyqtaryn aıtqan sala basshylyǵy jumys kúshin kórshiles elderden izdeıtinin aıtady. Jumysqa ornalasýǵa nıetti azamattardy ýaqytsha baspanamen qamtamasyz etý maqsatynda kompanııa zamanaýı úlgidegi 30 oryndyq jataqhana da salǵan.
Fermany keńeıtýmen qatar, ónimdilikti arttyrý maqsatynda ótken jyly jalpy quny 1 mlrd teńgege zamanaýı jańa tehnıkalar satyp alynǵan. Sonyń biri – «John Deere 6195M» traktoryn kompanııanyń bilikti mehanızatory, III dárejeli «Eńbek dańqy» ordeniniń ıegeri Erǵalı Shegebaev tizgindep júr.
«Búginde kompanııa qaraýyndaǵy 70 tehnıka, 30-ǵa tarta soqa, tyrma, shóp shapqysh syndy qosalqy quraldardy kóktemgi naýqandyq jumysqa daıyndap jatyrmyz. Osylardyń ishindegi eń ónimdisi, joǵaryda atalǵan jańa traktor kúni-túni avtopılotpen jumys isteıdi. Ony ótken jyly Respýblıka kúni qarsańynda Prezıdent Qasym-Jomart Toqaevtyń qolynan orden alyp kelgen ozat mehanızator, barlyq tehnıkany emin-erkin meńgergen bilikti ári tájirıbeli maman, ujymdaǵy eń bedeldi jumysshymyz Erǵalı Shegebaevtyń qolyna tapsyrdyq», deıdi kompanııanyń aýyl sharýashylyǵy jónindegi dırektory Suńǵat Toıshybek.
Abaı oblysy, Aıagóz aýdany, Myńbulaq aýylynan 2012 jyly jumys izdeı kelip, Kosmos aýylyna qonys tepken E.Shegebaev sodan beri osy kompanııada turaqty eńbek etedi. Kishkentaı kezinen traktor tizgindegen ákesin jaǵalap júrip, temir-tersekke kózi úırengen Erǵalı Nurǵazyuly eseıe kele áke jolyn qýyp, traktorshy bolǵan. Dala tósin dúbirge bólegen qarapaıym jumysshynyń eńbegi aqtalyp, memlekettik marapatqa ıe boldy.
«Erteń Astanaǵa, Memleket basshysynyń qolynan marapat alýǵa barasyz degendi estigenimde, ázil shyǵar dep oıladym. Traktor aıdap júrip, orden alamyn dep oılamappyn. Prezıdenttiń eńbek adamdaryn elep-eskerýi teńdessiz qýanysh boldy. «Eńbek etkenge baqyt basyn ıedi» degen osy bolar. Bıylǵy jyldyń «Jumysshy mamandyqtar jyly» dep jarııalanýy qarapaıym eńbek adamdarynyń mereıin ósirdi, eńsesin tiktedi. Qaraýyl bolyp, taksı júrgizip júrgen keı azamattardyń aýzynan «traktorshy da bolmappyz» degendi qulaǵymyz jıi shalyp qalady. Sebebi traktorshyǵa suranys joǵary. Traktor tizgindeýge de bilim men qajyrly eńbek kerek. Meni bala jastan eńbekke baýlyǵan ata-anama, 8-synyptan soń ýchılıshege jibergen ustazdaryma da alǵysym sheksiz», dep ezý tartqan traktorshy E.Shegebaev eńbeginiń aqtalǵanyna dán rıza.
Tehnıkanyń túr-túri tizilgen keshende kóktemgi naýqanǵa daıyndyq jumysy júrgizilip jatqany birden baıqalady. Kıimderine maı sińgen mehanızatorlar qoldaryna burandalaryn, saýyq-saımandaryn alyp, mundaǵy tehnıkalardyń aqaýlaryn jasaýǵa bilek túre kirisip ketken.
«Kóktemniń bir kúni – jylǵa azyq» degen, aldaǵy naýqanǵa saqadaı-saı bolýdyń qam-qareketindemiz. Sehta turǵan traktorlarmen jer jyrtyp, tuqym sebýge paıdalanatyn tirkemelerdi maılap, búlingen jerlerin jóndep jatyrmyz. Daıyndyq jumysyna ujymdaǵy barlyq jumysshy atsalysady. Mehanızator traktor, kombaın júrgizip qana qoımaıdy, buzylyp qalǵan jaǵdaıda qarap otyrmaı, ony ózi jóndep alýǵa tyrysady. Osyndaǵy áriptesterimniń qolynan kelmeıtini joq. Olardyń árqaısysyn «besaspap maman» deýge ábden laıyq», deıdi «Eńbek dańqy» ordeniniń ıegeri.
Jumysshylardyń áleýmettik jaǵdaılaryn jasaý – kompanııanyń basty nazarynda. Mundaǵy jumysshylardyń ortasha aılyǵy – 350 myń teńge, budan bólek, merekelerde eńbekkerlerge syıaqy berý dástúrge aınalǵan. Eńbek ónimdiligin arttyryp, belsendilik tanytqan jumysshylar kompanııanyń Alǵyshat, Altyn medalimen qosa, baǵaly syılyqtar utyp alýǵa tyrysady. Sondaı-aq shıpajaılarǵa joldama alatyndyqtaryn da maqtanyshpen atady.
Sút ónimderin shyǵaratyn «Adal» kompanııasy eńbek adamdaryna qoldaý kórsetýmen qatar, qaıyrymdylyq sharalaryna úzbeı atsalysyp keledi. Bul rette aýyldyq ákimdikpen birlese jumys isteıdi. Kosmos aýylynyń kórkeıýine, áleýmettik jaǵdaıy tómen otbasylarǵa járdemdesýge, sondaı-aq qys aılarynda kóshelerdi qardan tazartýǵa tehnıkalarymen tegin kómektesýdi óz jaýapkershiligine alǵan jomarttyqtaryn aıryqsha atap ótken jón.
Almaty oblysy,
Eńbekshiqazaq aýdany