Elimizde 14 naýryzdan Ulystyń uly kúnine baılanysty naýryznama onkúndigi bastalady. Elorda ákimdigi Naýryz merekesine oraı qalada 200-den astam is-shara uıymdastyrylatynyn habarlady, dep jazady Egemen.kz.
Mereke lebin sezindiretin aýqymdy sharalar barysynda konsertter, kórmeler, spektaklder, shyǵarmashylyq keshter t.b uıymdastyrylady.
Búgin Kórisý kúni atap ótiledi. Osy kúnniń qurmetine №3 buqaralyq kitaphanada «Kóristim barsha qazaqpen» tarıhı-aǵartý keshi ótedi. Dostyq úıinde «Uly Elimizdiń Kórisý kúni – Amal merekesi» atty is-shara bolady. Sol kúni M.О́temisov atyndaǵy Oqýshylar saraıynda «Dostyq kerýeni» ulttyq mádenı festıvali, al ál-Farabı atyndaǵy Oqýshylar saraıynda «Naýryz shashý» teatr marafony uıymdastyrylady.
15 naýryz Qaıyrymdylyq kúnine arnalady. Bul kúnge oraı 14 naýryz kúni saǵat 11:00-de «Sharapat» áleýmettik qyzmet kórsetý ortalyǵynda «Naýryz-Dýman» qaıyrymdylyq konsertimen «Naz» memlekettik bı teatrynyń ártisteri óner kórsetedi. Erteńinde munda merekelik is-shara uıymdastyrylyp, «Igi ister marafony» men «Jaqsylyq jasa» aksııasy bastalady. Bul kúni eriktiler ardagerler men jalǵyzbasty zeınetkerlerdiń úılerine baryp, olarǵa «Igi ister marafony» aksııasy aıasynda azyq-túlik sebetterin taratady. Sondaı-aq, elordada «Ǵajaıyp sandyq» aksııasy uıymdastyrylady, onyń aıasynda balalar úılerine, qarttar úılerine jáne aýrýhanalarǵa arnaıy jáshikter qoıylady. Muqtajdar oǵan qajetti syılyqty (tamaq, kıim, oıynshyq nemese kitap) jaza alady, sodan keıin bul zattar mesenattardyń esebinen satyp alynyp, taratylady. Dostyq úıinde 15 naýryzda «Janashyrlyq pen qamqorlyq – elimizdiń tiregi» qaıyrymdylyq aksııasy josparlanyp otyr. «Balam-aı» ortalyǵynda «Áz-Naýryz» qaıyrymdylyq konsertin ótkizý josparlanǵan. Sol kúni «Baqytty Shańyraq» QQ tárbıelenýshilerine arnalǵan qaıyrymdylyq spektaklin «Sintez» izdestirý-eksperımenttik teatry kórsetedi.
15 naýryzdan bastap «Nurly júrek» áleýmettik qyzmet kórsetý ortalyǵynda «Jyl basy» shyǵarmashylyq kórmesi ashylady.
16 Naýryz – otbasylyq qundylyqtardyń rólin nasıhattaıtyn Otbasy kúni. Saǵat 11:00-de «Báıterek» monýmentinde saltanatty rásim ótedi, onda jas jubaılarǵa neke týraly kýálik beriledi, al altyn mereıtoıyn atap ótken erli-zaıyptylar mereıtoılar kitabyna engiziledi. Osy ýaqytta L.Gýmılev atyndaǵy Eýrazııa ulttyq ýnıversıtetinde jas jazýshylar arasynda «Armysyń, Áz-Naýryz» festıvali ótedi.
Sol kúni saǵat 10:00-de Saryarqa aýdanynda «Berekeli shańyraq» is-sharasy aıasynda 25-50 jyl nekede turǵan otbasylar quttyqtalady. Qalalyq perınataldyq ortalyqta «Naýryz bazarlyq» dástúri aıasynda jańa bosanǵan analardy quttyqtaıdy.
Bul kúni Kásiptik-tehnıkalyq kolledjde jas otbasylar arasynda sporttyq estafeta ótedi. Qatysýshylar ulttyq oıyndar arqan tartý, asyq, toǵyzqumalaq boıynsha synǵa túsedi.
16 naýryzda «Nura» Belsendi uzaq ómir súrý ortalyǵynda úlgili urpaq tárbıelegen otbasylar úshin mádenı is-shara ótedi.
16 naýryz kúni saǵat 15:00-de Mýzykalyq jas kórermen teatrynda «Baqytty shańyraq ıeleri» atty shyǵarmashylyq jas otbasylarymen kezdesý uıymdastyrylady.
17 naýryzda Astanada Mádenıet jáne ulttyq dástúrler kúni ótedi.
17-21 naýryz aralyǵynda paralımpıadalyq jattyǵý ortalyǵynda «Naýryz meıramyna» (toǵyzqumalaq, asyq atý, arqan tartý, armrestlıng) arnalǵan ulttyq sport túrleri boıynsha týrnır ótedi.
18 naýryz «Naýryznama» onkúndiginiń bir bóligi Ulttyq kıim kúnine arnalǵan. Osynyń qurmetine 15 - 18 naýryz aralyǵynda «Han Shatyr» SOO-da «Ulttyq kıimiń – ulttyń sáni» jármeńkesi ótedi.
Saǵat 10.00-den 18.00-ge deıin Sáken Seıfýllın murajaıynda Ulttyq kıim kúnine oraı murajaıǵa kelýshiler úshin Ulttyq formada ekskýrsııalar ótkiziledi. Saǵat 12:00-de E.Rahmadıev atyndaǵy Memlekettik akademııalyq fılarmonııada ulttyq kıimmen fleshmob uıymdastyrylady. Sonymen qatar, №2 balalar kitaphanasynda «Áz-Naýryz – jańarý men jańǵyrýdyń bastaýy» folklor saǵaty daıyndalyp otyr. Saǵat 14:00-de №8 kópshilik kitaphanada «Qosh keldiń, Áz-Naýryz» atty merekelik oıyn baǵdarlamasy uıymdastyrylady. Saǵat 15:00-de Ulttyq mýzeıde «Eń ádemi kıim – ulttyq kıim» etnofestıvali ótedi. M. О́temisov atyndaǵy Oqýshylar saraıynda jasóspirimder arasynda «Jigit sultany» respýblıkalyq baıqaýy, al Qazaqstan jeńil atletıkalyq sport kesheninde «Qamajaı» fleshmoby ótedi. Bul bıdi qalanyń 112 mektebiniń 15 pen 17 jas aralyǵyndaǵy qyzdary oryndaıdy.
19 naýryz – Jańarý kúni. Barlyq aýdanda «Taza Qazaqstan. Astana – tazalyq pen tártiptiń úlgisi» ekologııalyq aksııasy ótedi.
Sol kúni Temirjol turǵyn alabynda «Jas talanttar-2025» qolóner baıqaýy uıymdastyrylady. «Danalyq» joǵary medısınalyq kolledjinde «Umytylǵan ulttyq taǵamdar» ulttyq taǵam festıvali, saǵat 12:00-de №1 balalar kitaphanasynda «Naýryz – bereke men dástúr merekesi!» is-sharasy ótedi.
20 naýryzda ulttyq sport kúni atap ótiledi. Onyń qurmetine «Nurly júrek» áleýmettik qyzmet kórsetý ortalyǵynda «Ulttyq oıyndar» sporttyq jarysy ótkiziledi.
20 naýryzda Belsendi uzaq ómir súrý ortalyǵynda Esil aýdanynyń zeınetkerleri arasynda Toǵyzqumalaq ulttyq oıynynan jarys, «Nura» dene shynyqtyrý-saýyqtyrý kesheninde ulttyq sport túrlerinen týrnır uıymdastyrylady.
«Qazaqstan» jeńil atletıkalyq sport kesheninde bul kúni «Uly dala oıyndary» otbasylyq estafetasy (asyq atý, bes asyq, arqan tartý, láńgi tebý, sadaq atý) ótedi. «Arǵymaq» at-sporttyq saýyqtyrý kesheninde ulttyq oıyndardan (teńge ilý, sadaq atý, qyz qýý, kókpar, asyq atý, qusbegilik, atqa miný dástúri) qoıylymdaryn tamashalaýǵa bolady.
21 naýryz – birlik pen yntymaqtastyq kúni. Saǵat 17:00-de QR QK Ulttyq áskerı-patrıottyq ortalyǵynda «Dostyq sazy» qazaq orkestriniń konserti ótedi.
21 jáne 22 naýryzda saǵat 12:00 jáne 16:30-da Qýyrshaq teatry «Naýryz-Dýman» qýyrshaq shoýyna shaqyrady.
Osy kúnderi qalanyń barlyq aýdanynda «Naýryz meıramy» merekesine oraı turǵyndar arasynda ulttyq sport túrleri boıynsha jarystar ótedi. Sonyń ishinde Astanada mereke qurmetine «Walking Football» týrnıri ótedi. Elordalyq Dostyq úıinde «Qosh keldiń, Áz-Naýryz» atty is-shara uıymdastyrylady.
22 naýryz – Jyl basy. Bul kúni Beıbitshilik jáne kelisim saraıynda «Naýryz syılyǵy» is-sharasy ótedi. Saǵat 18:00-de Mýzykalyq jas kórermen teatrynda «Abaı-Toǵjan» spektakli usynylady.
23 naýryz – Tazarý kúni. Bul kúni tańǵy saǵat 9-dan bastap «Qamqor» áleýmettik qyzmet kórsetý ortalyǵynda aýmaqty qardan tazartý júrgiziledi. Saǵat 10:00-de elordalyq teatr ujymdary ekoaksııaǵa shyǵyp, óz ǵımarattarynyń mańyn tazartady.
23 naýryz saǵat 20:30-dan 21:30-ǵa deıin Astana «Jer Saǵaty» halyqaralyq ekologııalyq aksııasyn qoldaıdy. «Jer saǵaty» – Dúnıejúzilik jabaıy tabıǵat qorynyń (WWF) qoldaýymen jyl saıynǵy halyqaralyq is-shara, oǵan álemniń túkpir-túkpirinen 2 mıllıardtan astam adam qatysady. Aksııanyń maqsaty – jer betindegi tabıǵat pen resýrstarǵa jaýapkershilikpen qaraýǵa nazar aýdarý.
Bul kúni elordanyń barlyq aýdanynda tazalyq estafetasy aıasynda «Tazartý» jalpyulttyq ekologııalyq aksııasy ótedi, Jańa jyldy jańa maqsattarmen qarsy alýdyń sımvoly retinde aýlalardy qar men qoqystan tazartý boıynsha is-sharalar uıymdastyrylady.