Naýryznama onkúndigi negizinde 18 naýryz kúni elimizde Ulttyq kıim kúni toılanady, dep jazady Egemen.kz.
Qazaq halqynyń ulttyq kıimderi dáýirden dáýirge kóship, baba bolmysyn, ana qasıetin, ulttyq tanym, túsinigin búginge jetkizgen materıaldyq mıras. Ulttyq kıimniń shyǵý, qalyptasý, damý tarıhy ata-babamyzdyń tynys-tirshiligi, salt-dástúrimen tikeleı baılanysty.
Ulttyq naqysh bederlengen kıimder kúndelikti tirlikke, merekelik sán-saltanatqa laıyqtalyp paıdalanylǵan. Tarıhı derekter qazaq halqynyń sándi kıingennin aıǵaqtaıdy. Máselen, T.Atkınson qazaq ómirinen qujatty sýretter túsirgen. Ol HIH ǵasyrdaǵy qazaqtyń ataqty adamdarynyń merekelik kıimderin bylaısha sýretteıdi: «Meniń basshym ústine qara tústi barqyttan tigilgen shapan, basyna ádemi kestelengen tymaq, al aıaǵyna bıik óksheli qyzyl bylǵarydan tigilgen etik kıgen. Onyń áıeli saltanatty reńk beretin sary, qyzyl jáne jasyl tústi jibekten tigilgen shapan kıetin. Sultan basyna tyǵyz jibekten tigilgen, kúmispen kestelengen bas kıim, ústine kók bulyńǵyr tústi shapan, aıaǵyna qyzyl qońyr bylǵarydan tigilgen bıik óksheli etik kıetin. Onyń áıeli ústine ádemi qara shapan, basyna ushy úshkirleý, taspasy beline deıin túsken, shetteri jibekpen ásem kestelengen bas kıim kıgen», dep jazǵan.
Bul sýretti sózde beınelengen kıim úlgileri qazaq halqy kıgen ulttyq kıimniń bir parasy ǵana ekeni daýsyz. Halqymyz kıimniń sánine ǵana emes, fýnksııalyq mánine de erekshe den qoıǵan ári jas erekshelikteri men áleýmettik statýsyna qaraı obrazdaryn ózgertip otyrǵan. Ata-babamyz jyl mezgilderine saı adamdy terletpeıtin, keı tusta jaýratpaıtyn materıal túrilerin dáldikpen tańdaı bilgen. Osy oraıda olardyń qulannyń, kıiktiń, jolbarystyń terilerin, sondaı-aq qara tústi janattyń, sý tyshqannyń, bulǵynnyń jáne sýsardyń, aq tústi tyshqannyń, kúzenniń úlbirlerin asa baǵaly dep sanaǵanyn aıta ketken jón. Budan bólek qus qanattaryn, qasyr, túlki syndy janýarlardyń úlbirlerin, qozy, túıe terilerin de jıi paıdalanǵan.
Búginde el arasynda ulttyq kıimderdi tek merekelerde emes, kúndelikti kııýge degen talpynys artyp keledi. Bul úrdis ulttyq kıimderdi ulyqtap qoımaı, urpaq sanasyna qundylyǵyn tóte jolmen sińirýde utymdy tásil der edik. Bala kúnnen halyq murasyn kórip, ustap ósken urpaqtyń da eldik bederlerdi esten shyǵarmasy anyq.