Astana qalasy Ortalyqtandyrylǵan kitaphanalar júıesi №3 balalar kitaphanasy ujymynyń uıymdastyrýymen «17 naýryz – mádenıet jáne ulttyq salt-dástúr» kúnine oraı tanymdyq, etnografııalyq sabaq ótti.
Onda elordanyń №14 mektep-gımnazııasynyń bastaýysh synyp oqýshylary qatysyp, kitaphanashylar daıyndaǵan «Sen salt-dástúrdi bilesiń be?» atty tanymdyq suraq-jaýap sabaǵyna qatysyp, halqymyzdyń salt-dástúrlerimen tanysty.
Atap aıtar bolsaq, jas órender halqymyzdyń turmystyq qundy muralary: jańa týǵan sábıge at qoıý, besikke salý, qyrqynan shyǵarý, tusaý kesý, atqa mingizý, toqym qaǵý qatarly salt-dástúrimizdiń mańyzdylyǵymen tanysyp, ejelden kele jatqan kóshpeli qoǵamnyń ǵuryptyq salty: «súıinshi suraý», «bazarlyq berý», «shashý shashý», «erýlik», «qalaý», «qutty bolsyn aıtý» sııaqty etnografııalyq uǵymdardyń tereńine úńildi.
Sonymen qatar jetkinshekter burynǵylardyń «Jeti atasyn bilgen er – jeti jurttyń qamyn jer» degenindeı, halqymyzdyń genetıkalyq-týystyq qatynasy haqynda júıeli túsinikke qanyǵyp, kóshpeli babalarymyzdyń berekeli azyǵy sanalatyn ulttyq taǵamdar: qurt, irimshik, qymyz, jent, baýyrsaq, t.b. týraly málimetke sýsyndady.
Sabaq barysynda mektep oqýshylary ózara ulttyq oıyndar oınap, naýryz jumbaq sheship saıysty. Sońynda jas qonaqtar otandyq hám halyqaralyq án baıqaýlarynyń júldegeri, bolashaǵynan zor úmit kúttiretin daryndy ánshi Áıgerim Manapova shyrqaǵan ánderdi tyńdap, oqýshy qyzdardyń «Qamajaı» bıine tánti boldy.